کراچی کے علاقے کریم آباد میں اپوا کالج کے قریب ڈکیتی کی بڑی واردات پیش آئی، جہاں ڈاکو ایک سنار سے ایک کروڑ 20 لاکھ روپے لوٹ کر فرار ہوگئے۔
کریم آباد جیولرز ایسوسی ایشن کے صدر کے مطابق متاثرہ سنار سونا فروخت کرنے کے لیے صدر کی لیب گیا تھا اور واپسی پر اپوا کالج کے قریب چار مسلح ملزمان نے اسے گھیر لیا۔ ملزمان نے اسلحہ کے زور پر نقد رقم چھین لی اور باآسانی فرار ہوگئے۔
پولیس حکام کا کہنا ہے کہ واقعے کی تحقیقات شروع کر دی گئی ہیں اور ملزمان کی شناخت کے لیے قریبی سی سی ٹی وی فوٹیجز سمیت دیگر شواہد اکٹھے کیے جارہے ہیں۔ پولیس نے متاثرہ سنار سے بھی مزید تفصیلات حاصل کرلی ہیں تاکہ ملزمان تک جلد پہنچا جاسکے۔
