دبئی: ایشیا کپ کے سپر فور مرحلے کے چوتھے میچ میں بھارت نے شاندار کارکردگی کا مظاہرہ کرتے ہوئے بنگلہ دیش کو 41 رنز سے شکست دے کر فائنل کے لیے کوالیفائی کر لیا۔ دبئی انٹرنیشنل کرکٹ اسٹیڈیم میں کھیلے گئے اس اہم میچ میں بھارتی بلے بازوں اور باؤلرز نے شائقین کرکٹ کو بھرپور مقابلہ دیکھنے کا موقع فراہم کیا۔
بھارت نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 168 رنز بنائے۔ اوپنر ابھیشک شرما شاندار فارم میں نظر آئے اور صرف 37 گیندوں پر 75 رنز کی جارحانہ اننگز کھیلی، جس میں 6 دلکش چوکے اور 4 شاندار چھکے شامل تھے۔ شبمن گل نے 29 رنز کی اننگز کھیلی جبکہ آل راؤنڈر ہاردک پانڈیا نے آخر میں ذمہ دارانہ کھیل پیش کرتے ہوئے 38 رنز جوڑ کر ٹیم کا اسکور مستحکم کیا۔ بنگلہ دیش کی طرف سے رشاد حسین نے دو وکٹیں حاصل کیں جبکہ مستفیض الرحمٰن، تنظیم حسن اور سیف الدین نے ایک، ایک کھلاڑی کو آؤٹ کیا۔
169 رنز کے ہدف کے تعاقب میں بنگلہ دیش کی بیٹنگ لائن بھارتی باؤلرز کے سامنے بے بس دکھائی دی اور پوری ٹیم 127 رنز پر ڈھیر ہو گئی۔ سیف حسین 69 رنز بنا کر نمایاں بلے باز رہے تاہم دیگر کھلاڑی خاطر خواہ کارکردگی نہ دکھا سکے اور 9 کھلاڑی ڈبل فیگر میں بھی داخل نہ ہو پائے۔ بھارتی باؤلرز میں کلدیپ یادیو نے شاندار باؤلنگ کا مظاہرہ کرتے ہوئے 3 وکٹیں حاصل کیں، جبکہ جسپریت بمرا اور ورون چکراورتی نے دو، دو کھلاڑیوں کو پویلین بھیجا۔
اس فتح کے ساتھ بھارت نے ایشیا کپ 2025 کے فائنل میں اپنی جگہ پکی کر لی ہے۔ اب دوسرے فائنلسٹ کا فیصلہ 25 ستمبر کو پاکستان اور بنگلہ دیش کے درمیان ہونے والے اہم میچ کے بعد ہوگا۔ یاد رہے کہ سپر فور مرحلے میں بھارت نے پاکستان کو 6 وکٹوں سے اور بنگلہ دیش نے سری لنکا کو 4 وکٹوں سے شکست دی تھی، جس کے بعد یہ مقابلہ ٹورنامنٹ کے فائنل کی دوڑ میں انتہائی اہمیت اختیار کر گیا ہے۔
