لاہور: وزیراعلیٰ پنجاب مریم نواز نے کہا ہے کہ پنجاب انفورسمنٹ اینڈ ریگولیٹری اتھارٹی (پیرا فورس) کا قیام ان کا خواب تھا جو آج شرمندہ تعبیر ہوا ہے۔ انہوں نے اعلان کیا کہ قبضے کے مقدمات کے فیصلے اب 90 روز میں ہوں گے اور قبضہ مافیا کو 10 سال تک کی سزا دی جا سکے گی۔
پنجاب انفورسمنٹ اینڈ ریگولیٹری اتھارٹی کی پاسنگ آؤٹ پریڈ سے خطاب کرتے ہوئے وزیراعلیٰ نے پاس آؤٹ ہونے والے نوجوان اہلکاروں کو مبارکباد دی اور کہا کہ اللہ نے آپ کو عوام کی خدمت کا موقع دیا ہے۔ ’’آپ کے کندھوں پر پنجاب کے کروڑوں عوام کی ذمہ داری ہے، وعدہ کریں کہ ایک پیسہ رشوت نہیں لیں گے‘‘۔
مریم نواز نے کہا کہ کاروباری حضرات جائز منافع کمائیں لیکن عوام کو ریلیف ملنا چاہیے، گندم اور آٹے کی قیمت حکومت کی مقررہ ریٹ لسٹ کے مطابق یقینی بنانی ہے۔ انہوں نے کہا کہ پیرا فورس کے قیام کا مقصد عوام کو ظلم سے بچانا اور انصاف دلانا ہے۔
وزیراعلیٰ نے کہا کہ بازاروں سے تجاوزات کے خاتمے پر عوام خصوصاً خواتین خوش ہیں۔ پیرا فورس میں باصلاحیت خواتین کی شمولیت عوام کو سہولت فراہم کرنے کی ترجیح کا مظہر ہے۔ انہوں نے دعویٰ کیا کہ پنجاب کے کئی اضلاع ایسے ہیں جہاں جرائم کی شرح صفر ہے اور عوام سکون اور امن کا اظہار کر رہے ہیں۔
مریم نواز نے کہا کہ ’’میرا خواب ہے کہ پنجاب ماں اور بیٹیوں کے لیے محفوظ ترین جگہ بنے۔‘‘ انہوں نے اعلان کیا کہ بیواؤں اور یتیموں کی زمینوں پر قبضہ کرنے والوں کے خلاف خصوصی عدالتیں قائم کی جا رہی ہیں، جہاں قبضے کے مقدمات کا فیصلہ 90 دن میں کیا جائے گا اور مافیا کو 10 سال تک قید کی سزا ہو گی۔
اس موقع پر وزیراعلیٰ نے پیرا فورس کے مارچ پاسٹ کا معائنہ کیا، نمایاں کارکردگی دکھانے والے اہلکاروں میں اعزازات تقسیم کیے اور ڈائریکٹر جنرل پیرا کی جانب سے سووینئر بھی وصول کیا۔
