سوات: سوات اور گردونواح میں اتوار کی شام 4.6 شدت کے زلزلے کے جھٹکے محسوس کیے گئے جس سے علاقے میں خوف و ہراس پھیل گیا۔ زلزلے کے بعد لوگ کلمہ طیبہ کا ورد کرتے ہوئے گھروں اور دفاتر سے کھلے مقامات پر نکل آئے۔
زلزلہ پیما مرکز کے مطابق زلزلے کی شدت ریکٹر اسکیل پر 4.6 ریکارڈ کی گئی جبکہ اس کی زیرِ زمین گہرائی 152 کلومیٹر تھی۔ زلزلے کا مرکز افغانستان اور پاکستان کی سرحد کے قریب کوہِ ہندوکش کا پہاڑی سلسلہ بتایا گیا ہے، جو اس سے قبل بھی کئی زلزلوں کا مرکز بن چکا ہے۔
زلزلے کے جھٹکے سوات شہر کے علاوہ قریبی علاقوں میں بھی محسوس کیے گئے۔ مقامی لوگوں کا کہنا ہے کہ جھٹکے چند سیکنڈز پر مشتمل تھے لیکن شدت ایسی تھی کہ شہری گھبراہٹ میں عمارتوں سے باہر نکل آئے۔ انتظامیہ کے مطابق اب تک کسی جانی یا مالی نقصان کی اطلاع موصول نہیں ہوئی، تاہم متعلقہ اداروں کو الرٹ کر دیا گیا ہے اور صورتحال پر نظر رکھی جا رہی ہے۔
ماہرین کے مطابق کوہِ ہندوکش کا علاقہ زلزلوں کے حوالے سے انتہائی حساس سمجھا جاتا ہے اور اس خطے میں درمیانے اور شدید نوعیت کے زلزلے وقتاً فوقتاً آتے رہتے ہیں۔ حالیہ زلزلے کو بھی اسی سلسلے کی ایک کڑی قرار دیا جا رہا ہے۔
یاد رہے کہ ماضی میں بھی ہندوکش پہاڑی سلسلے میں آنے والے زلزلوں کے جھٹکے پاکستان کے شمالی علاقوں سمیت اسلام آباد اور پنجاب کے بعض حصوں تک محسوس کیے جاتے رہے ہیں۔ ماہرین شہریوں کو ہدایت دیتے ہیں کہ کسی بھی ہنگامی صورتحال میں احتیاطی تدابیر اپنائیں اور افواہوں پر کان نہ دھریں۔
