ایشیا کپ میں پاک بھارت میچ کے بعد بھارتی کپتان سوریا کمار یادیو کے متنازع اور سیاسی بیان نے نیا تنازع کھڑا کر دیا ہے، جس کے باعث وہ بڑی مشکل میں پھنس گئے ہیں۔ بھارتی میڈیا کے مطابق پاکستان کرکٹ بورڈ (پی سی بی) کی باضابطہ شکایت پر انٹرنیشنل کرکٹ کونسل (آئی سی سی) نے معاملے کا نوٹس لے لیا ہے اور بھارتی کپتان کے خلاف کارروائی کے امکانات بڑھ گئے ہیں۔
رپورٹس کے مطابق پاکستان کی جانب سے آئی سی سی کو جمع کرائے گئے شواہد کا میچ ریفری رچی رچرڈسن نے تفصیلی جائزہ لیا ہے، جس کے بعد سوریا کمار کے خلاف کارروائی کی سفارش کی گئی ہے۔ میچ ریفری نے بھارتی ٹیم مینجمنٹ کو بھی ای میل کے ذریعے آگاہ کیا ہے کہ کپتان کے پریزنٹیشن میں دیے گئے غیر مناسب سیاسی ریمارکس کھیل کی روح کے منافی ہیں اور اس سے کھیل کی ساکھ کو نقصان پہنچا ہے۔
بھارتی میڈیا کے مطابق آئی سی سی اس وقت پاکستان کی جانب سے جمع کرائی گئی 2 آفیشل رپورٹس کا بھی جائزہ لے رہا ہے اور جلد اس معاملے کی باضابطہ سماعت متوقع ہے۔ اس پیش رفت کے بعد سوریا کمار یادیو کے خلاف باقاعدہ کارروائی کے امکانات میں مزید اضافہ ہو گیا ہے۔
یاد رہے کہ سوریا کمار یادیو نے ایشیا کپ کے گروپ اسٹیج میں پاکستان کے خلاف میچ جیتنے کے بعد پریزنٹیشن کے دوران پہلگام واقعے کا ذکر کرتے ہوئے ایسا سیاسی بیان دیا تھا، جسے نہ صرف غیر مناسب قرار دیا جا رہا ہے بلکہ کھیل کے اصولوں کے خلاف بھی سمجھا جا رہا ہے۔ اس بیان کے بعد پاکستان کی جانب سے شدید ردعمل سامنے آیا تھا، جبکہ سابق بھارتی کپتانوں اور تجزیہ کاروں نے بھی کھیل کو سیاست سے الگ رکھنے پر زور دیا تھا۔
