نیویارک: وزیراعظم پاکستان شہباز شریف آج شام اقوام متحدہ کی جنرل اسمبلی کے اجلاس سے اہم خطاب کریں گے۔ جیو نیوز کے مطابق وزیراعظم امریکی صدر ڈونلڈ ٹرمپ سے واشنگٹن میں ملاقات کے بعد نیویارک پہنچ چکے ہیں جہاں وہ عالمی رہنماؤں کے سامنے پاکستان کا مؤقف پیش کریں گے۔
وزیراعظم کے خطاب میں مسئلہ کشمیر اور فلسطین کے دیرینہ تنازعات کو خصوصی طور پر اجاگر کیا جائے گا۔ ذرائع کے مطابق شہباز شریف پاک بھارت کشیدگی، خطے کی سیکیورٹی صورتِ حال اور مشرق وسطیٰ میں قیام امن کے لیے پاکستان کے کردار پر بھی روشنی ڈالیں گے۔
حکام کے مطابق وزیراعظم عالمی برادری کو یاد دلائیں گے کہ جنوبی ایشیا میں پائیدار امن کے لیے مسئلہ کشمیر کا منصفانہ حل ناگزیر ہے، جبکہ فلسطینی عوام کے لیے انسانی حقوق کی فراہمی اور دو ریاستی حل کی اہمیت پر بھی زور دیا جائے گا۔
اقوام متحدہ کے اجلاس میں دنیا بھر کے سربراہان شریک ہیں، اور پاکستانی وفد کو توقع ہے کہ وزیراعظم کا خطاب نہ صرف پاکستان کے مؤقف کو مضبوطی سے پیش کرے گا بلکہ عالمی رائے عامہ کو خطے کے اہم مسائل کی جانب متوجہ کرے گا۔
