دبئی میں پاکستان اور بھارت کے درمیان آج ایشیا کپ کرکٹ فائنل کھیلا جا رہا ہے۔ میچ سے قبل دبئی پولیس نے شائقین کے لیے اردو میں خصوصی ہدایات جاری کی ہیں تاکہ سکیورٹی اور نظم و ضبط کو یقینی بنایا جا سکے۔
ایونٹس سکیورٹی کمیٹی کے مطابق دبئی انٹرنیشنل کرکٹ اسٹیڈیم میں تمام حفاظتی انتظامات مکمل کر لیے گئے ہیں۔ سکیورٹی کے خصوصی یونٹس ہر ممکن صورتحال سے نمٹنے کے لیے تیار ہیں اور کسی بھی خلاف ورزی پر فوری کارروائی کی جائے گی۔
دبئی پولیس نے شائقین کو ہدایت دی ہے کہ وہ کھیل کے دوران کھیلوں کے جذبے کا مظاہرہ کریں، قوانین کی پابندی کریں اور ایسا کوئی عمل نہ کریں جو عوامی سلامتی کے لیے خطرہ بنے یا نفرت اور نسل پرستی کو فروغ دے۔
ٹکٹ ہولڈرز کو مشورہ دیا گیا ہے کہ میچ شروع ہونے سے کم از کم تین گھنٹے پہلے اسٹیڈیم پہنچیں۔ ایک ٹکٹ پر صرف ایک بار انٹری ہوگی اور دوبارہ داخلہ کی اجازت نہیں ہوگی۔ شائقین سے کہا گیا ہے کہ وہ اسٹیڈیم میں موجود رضاکاروں اور سکیورٹی اہلکاروں کی ہدایات پر مکمل عمل کریں اور اپنی گاڑیاں صرف مخصوص پارکنگ ایریاز میں کھڑی کریں۔
اسٹیڈیم میں لانے پر پابندی والی اشیاء میں آتش بازی، فلیئرز، لیزر پوائنٹرز، نوکیلی اشیاء، ہتھیار، زہریلے مادے اور ریموٹ کنٹرول ڈیوائسز شامل ہیں۔ بڑی چھتریاں، کیمرہ ٹرائی پوڈز، سیلفی اسٹکس، سیاسی بینرز، پالتو جانور، سائیکلیں، اسکیٹ بورڈز، اسکوٹرز اور شیشے کی بنی اشیاء بھی ممنوع ہیں۔
دبئی پولیس نے تمام شائقین سے اپیل کی ہے کہ وہ سکیورٹی ٹیموں کے ساتھ مکمل تعاون کریں، حفاظتی ہدایات پر سختی سے عمل کریں اور میچ سے بھرپور لطف اٹھائیں تاکہ کھیل کا مثبت اور محفوظ ماحول برقرار رہے۔
