لاہور: پاکستان ویمنز کرکٹ ٹیم کے ہیڈ کوچ اور کھلاڑیوں نے ایشیا کپ کے فائنل میں شریک مردوں کی قومی کرکٹ ٹیم کیلئے نیک تمناؤں اور مکمل سپورٹ کا اظہار کیا۔
ہیڈ کوچ محمد وسیم نے کہا کہ پاکستان اور بھارت کا بڑا فائنل ہے، پوری ٹیم کی دعائیں اور مکمل سپورٹ قومی ٹیم کے ساتھ ہیں، انشاءاللہ پاکستان میچ جیتے گا اور ملک کا نام روشن کرے گا۔
ویمن کرکٹر سدرہ امین کا کہنا تھا کہ یہ پاکستان ٹیم کیلئے بہت بڑا دن ہے، ہماری طرف سے مکمل سپورٹ اور نیک خواہشات ٹیم کے ساتھ ہیں۔ انہوں نے کہا کہ بڑے دل سے کھیلیں، اللہ تعالیٰ بھی ان کا ساتھ دیتا ہے جو بہادری سے کھیلتے ہیں، ہم چاہتے ہیں کہ ایشیا کپ پاکستان جیت کر واپس آئے۔
کرکٹر عالیہ ریاض نے کہا کہ سب کی دعائیں مینز ٹیم کے ساتھ ہیں، ’’بیسٹ آف لک‘‘، جم کر کھیلیں اور ملک کا نام روشن کریں۔
اومیمہ سہیل نے کہا کہ پاکستان مینز ٹیم کو ایشیا کپ فائنل کے لیے نیک خواہشات، انشاءاللہ پاکستان میچ جیتے گا۔ کرکٹر نتالیہ پرویز نے کہا کہ پاکستان ٹیم کو گڈ وشز دیتی ہوں اور امید ہے کہ آپ اچھا کھیلیں گے اور ایشیا کپ جیتیں گے۔
کرکٹر شوال ذوالفقار نے کہا کہ پاکستان اور بھارت کا فائنل ہونے جا رہا ہے، میں پاکستان ٹیم کو ’’گڈ لک‘‘ کہتی ہوں، امید ہے کہ پاکستان ٹیم اچھا کھیلے گی اور ایشیا کپ جیت کر وطن واپس آئے گی۔
سیدہ عروب شاہ کا کہنا تھا کہ پاکستان ٹیم کو ’’بیسٹ وشز‘‘ ہیں اور امید ہے کہ آپ ایشیا کپ کا فائنل جیت کر آئیں گے، پوری قوم کی دعائیں آپ کے ساتھ ہیں۔
