مدینہ منورہ سے افسوسناک خبر ہے کہ مسجد نبوی ﷺ میں قرآن مجید پڑھانے والے پاکستانی نژاد جلیل القدر مدرس شیخ بشیر احمد صدیق انتقال کرگئے۔
جامعہ اشرفیہ لاہور کے ترجمان کے مطابق شیخ بشیر احمد صدیق کی نمازِ جنازہ مسجد نبوی ﷺ میں ادا کی گئی اور بعد ازاں انہیں جنت البقیع میں سپرد خاک کر دیا گیا۔
شیخ بشیر احمد صدیق گزشتہ 60 برس سے زائد عرصے تک مسجد نبوی میں قرآنِ مجید کی تدریس کے منصب پر فائز رہے۔ انہوں نے اپنی پوری زندگی قرآنِ کریم کی تعلیم، تبلیغ اور خدمت کے لیے وقف کر دی۔ دنیا کے مختلف خطوں میں ان کے ہزاروں شاگرد موجود ہیں جو آج بھی ان کے علم اور تربیت سے فیض یاب ہو رہے ہیں۔
ان کے انتقال پر دینی اور علمی حلقوں میں گہرے دکھ اور رنج کا اظہار کیا جا رہا ہے۔ انہیں قرآن کے سچے خادم اور علم و اخلاق کے پیکر کے طور پر یاد کیا جا رہا ہے۔
