کراچی: پاکستان کرکٹ بورڈ (پی سی بی) آئندہ سال پاکستان سپر لیگ (پی ایس ایل) کا گیارھواں ایڈیشن رمضان کے بعد اپریل اور مئی میں منعقد کرانے کا خواہاں ہے، جس میں دو نئی ٹیموں کے اضافے کی بھی منصوبہ بندی کی جا رہی ہے۔ اس طرح پی ایس ایل 11 کا شیڈول انڈین پریمیئر لیگ (آئی پی ایل) سے ٹکرا سکتا ہے، جو مارچ سے مئی تک کھیلا جائے گا۔
ذرائع کے مطابق پی ایس ایل فرنچائزز اور پی سی بی کے درمیان متعدد اہم معاملات ابھی تک حل طلب ہیں اور اس حوالے سے کوئی باضابطہ میٹنگ تاحال منعقد نہیں ہوئی جس میں آئندہ ایڈیشن کے حوالے سے تفصیلی بات چیت ہو سکے۔
پی سی بی ذرائع کا کہنا ہے کہ آئندہ سال کے آغاز میں ٹی ٹوئنٹی ورلڈ کپ کی مصروفیات کے باعث پی ایس ایل کو روایتی طور پر فروری یا مارچ میں کرانا ممکن نہیں ہوگا۔ اس دوران پاکستان ٹیم کی شیڈول مصروفیات میں آسٹریلیا کے خلاف تین ٹی ٹوئنٹی میچوں کی سیریز اور اس کے بعد بنگلا دیش کے خلاف دو ٹیسٹ میچوں کی سیریز شامل ہے۔
مزید یہ کہ ورلڈ کپ اور پی ایس ایل کے اختتام کے بعد پاکستان اور آسٹریلیا کے درمیان تین ون ڈے انٹرنیشنل میچوں کی سیریز بھی طے ہے، جب کہ بنگلا دیش کی ٹیسٹ سیریز کے بعد وائٹ بال کرکٹ (ون ڈے اور ٹی ٹوئنٹی) کے مقابلے مئی کے بعد ہوں گے۔
پاکستان ٹیم آئندہ سال بنگلا دیش میں تین ون ڈے اور تین ٹی ٹوئنٹی میچوں کی سیریز کھیلے گی، جب کہ زمبابوے کے خلاف بھی تین ون ڈے اور تین ٹی ٹوئنٹی میچوں کی سیریز طے ہے۔ ان تمام بین الاقوامی مصروفیات کے باعث پی سی بی نے پی ایس ایل کو رمضان کے بعد اپریل اور مئی میں منتقل کرنے کا فیصلہ کیا ہے۔
دلچسپ امر یہ ہے کہ آئی پی ایل کا اگلا ایڈیشن 15 مارچ سے 31 مئی تک کھیلا جائے گا، اس لیے امکان ہے کہ دونوں بڑی فرنچائز لیگوں کے میچز کی تاریخوں میں ٹکراؤ ہو۔ اس صورت میں متعدد غیر ملکی کھلاڑیوں کو پی ایس ایل یا آئی پی ایل میں سے کسی ایک لیگ کا انتخاب کرنا پڑے گا، جس سے ٹیموں کی دستیابی اور اسکواڈز کی منصوبہ بندی پر اثر پڑ سکتا ہے۔
یاد رہے کہ پی سی بی نے حال ہی میں پی ایس ایل کے 10 سال مکمل ہونے پر ایک ڈاکیومینٹری بنانے کا فیصلہ کیا ہے، جب کہ بی بی سی نے پی ایس ایل کو دنیا کی دوسری سب سے دلچسپ فرنچائز لیگ قرار دیا ہے۔ اسی دوران پی ایس ایل 10 نے براڈکاسٹ ویورشپ میں نیا ریکارڈ بھی قائم کیا، جو لیگ کی بڑھتی ہوئی مقبولیت کا واضح ثبوت ہے۔
