اسلام آباد: چیئرمین پاکستان کرکٹ بورڈ اور وفاقی وزیر داخلہ محسن نقوی کے فوری نوٹس کے بعد افغانستان فٹبال ٹیم کو ویزے جاری کر دیے گئے۔
ذرائع کے مطابق محسن نقوی نے آج ہی افغانستان ٹیم کو ویزے جاری نہ ہونے کے معاملے پر نوٹس لیتے ہوئے وزارتِ داخلہ اور متعلقہ اداروں کو ہدایت دی تھی کہ کھلاڑیوں کو فوری ویزے فراہم کیے جائیں تاکہ وہ پاکستان آ کر ایشین کپ کوالیفائر میچ میں حصہ لے سکیں۔
محسن نقوی نے سماجی رابطے کی ویب سائٹ ایکس (سابقہ ٹوئٹر) پر تصدیق کرتے ہوئے بتایا کہ افغانستان کی ٹیم کو ویزے جاری کر دیے گئے ہیں، اب میچ اپنے شیڈول کے مطابق ہوگا۔
یاد رہے کہ اے ایف سی ایشین کپ کوالیفائر میں پاکستان اور افغانستان کے درمیان فٹبال میچ 9 اکتوبر کو شیڈول تھا، تاہم 7 اکتوبر کی شام تک افغانستان فٹبال ٹیم کے تمام کھلاڑیوں کو ویزے جاری نہیں ہوئے تھے جس کے باعث میچ کے انعقاد پر خدشات پیدا ہوگئے تھے۔
ذرائع کے مطابق گزشتہ روز افغان فٹبال ٹیم کے 10 آفیشلز اور 3 کھلاڑیوں کو ویزے جاری کیے گئے تھے، جنہیں کابل میں پاکستانی سفارتخانے میں بائیو میٹرک تصدیق کے بعد ویزے دیے گئے۔ تاہم ٹیم کے بیشتر کھلاڑی افغانستان سے باہر مختلف ممالک میں مقیم ہیں، جس کی وجہ سے ان کے ویزوں کے اجرا میں تاخیر ہوئی۔
وزارتِ داخلہ کی ہدایت پر اب تمام کھلاڑیوں اور آفیشلز کے ویزے مکمل کر دیے گئے ہیں، اور ذرائع کے مطابق افغان ٹیم جلد پاکستان روانہ ہوگی تاکہ 9 اکتوبر کو ہونے والا کوالیفائر میچ شیڈول کے مطابق کھیلا جا سکے۔
سرکاری سطح پر ویزوں کے اجرا کے اس عمل سے پاکستان فٹبال فیڈریشن اور اے ایف سی حکام نے اطمینان کا اظہار کیا ہے۔
