اسلام آباد: فیڈرل پبلک سروس کمیشن (FPSC) نے سنٹرل سپیرئیر سروسز (CSS) امتحان 2024 کے لیے تفصیلی اسامیوں کا اعلان کر دیا ہے۔ کل 364 اسامیوں میں سے 247 نئی ہیں جبکہ 117 گزشتہ سالوں کی خالی اسامیاں شامل ہیں۔
اوپن میرٹ کے تحت 214، خواتین کے لیے 32، اور اقلیتوں کے لیے 118 اسامیاں مختص کی گئی ہیں۔ صوبائی تقسیم کے مطابق پنجاب کے لیے 179، خیبرپختونخوا کے لیے 48، بلوچستان کے لیے 31، سندھ (دیہی) کے لیے 32، سندھ (شہری) کے لیے 29، سابقہ فاٹا کے لیے 15، آزاد کشمیر کے لیے 8، اور گلگت بلتستان کے لیے 4 اسامیاں مخصوص کی گئی ہیں۔
کامیاب امیدواروں کو پاک ایڈمنسٹریٹو سروس (PAS)، پولیس سروس آف پاکستان (PSP)، فارن سروس اور دیگر اہم سینٹرل سپیرئیر سروسز گروپس میں تعینات کیا جائے گا۔ امیدوار FPSC کی ویب سائٹ پر 22 اکتوبر 2024 تک آن لائن درخواستیں جمع کراسکتے ہیں۔
درخواست دہندگان کے پاس کم از کم بیچلر ڈگری ہونی چاہیے، جبکہ عمر کی حد 21 سے 30 سال ہے۔ بعض مخصوص زمروں میں عمر میں رعایت دی گئی ہے۔ امتحان کا تفصیلی شیڈول بعد میں جاری کیا جائے گا۔
یہ اسامیاں نوجوانوں کو ملکی اداروں میں اعلیٰ عہدوں پر خدمات انجام دینے کا بہترین موقع فراہم کریں گی۔
