راولپنڈی: امیر البحر ایڈمرل نوید اشرف نے امریکا کا اہم دورہ کیا، جس کے دوران انہوں نے امریکی بحریہ اور سول قیادت کے اعلیٰ حکام سے ملاقاتیں کیں۔ ان ملاقاتوں کو دونوں ممالک کے درمیان دفاعی تعاون اور میری ٹائم سکیورٹی کے شعبوں میں تعلقات کے فروغ کے لیے نہایت اہم قرار دیا جا رہا ہے۔
آئی ایس پی آر کے مطابق پاک بحریہ کے سربراہ نے اپنے دورہ امریکا میں امریکی ڈپٹی چیف آف نیول اسٹاف برائے آپریشنز اور امریکی کوسٹ گارڈ کے وائس کمانڈنٹ سے الگ الگ ملاقاتیں کیں۔ ان ملاقاتوں میں پیشہ ورانہ امور، دفاعی تعاون، علاقائی سلامتی، اور سمندری حدود میں مشترکہ اقدامات پر تبادلہ خیال کیا گیا۔
دورے کے دوران ایڈمرل نوید اشرف نے امریکہ کی نیشنل ڈیفنس یونیورسٹی کا بھی دورہ کیا اور یونیورسٹی کے صدر وائس ایڈمرل پیٹر اے گارون سے ملاقات کی۔ اس موقع پر پاک بحریہ کے کردار، خطے کی سکیورٹی صورتِ حال، اور تربیتی تعاون کے امکانات پر تفصیلی گفتگو ہوئی۔
نیول چیف نے امریکی محکمہ خارجہ کا بھی دورہ کیا جہاں ان کی ملاقات سیاسی و عسکری امور کے ڈپٹی اسسٹنٹ سیکرٹری سٹینلے ایل براؤن سے ہوئی۔ دونوں رہنماؤں نے باہمی دلچسپی کے امور، خطے میں استحکام، اور بحری دفاعی شراکت داری کو مزید مستحکم بنانے کے عزم کا اظہار کیا۔
دورے کے دوران ایڈمرل نوید اشرف نے امریکی سکالرز اور معروف تھنک ٹینکس کے ماہرین سے ایک تقریب میں خطاب بھی کیا۔ انہوں نے اپنے خطاب میں علاقائی میری ٹائم سکیورٹی چیلنجز، بحرِ ہند میں ابھرتی ہوئی جیو اسٹریٹجک صورتحال، اور بین الاقوامی سطح پر مشترکہ میری ٹائم اقدامات میں پاکستان کے مثبت کردار پر روشنی ڈالی۔
ترجمان پاک بحریہ کے مطابق ایڈمرل نوید اشرف کا یہ دورہ امریکہ اور پاکستان کے درمیان میری ٹائم سکیورٹی، پیشہ ورانہ تربیت، اور دفاعی تعاون کو مزید مضبوط بنانے میں ایک سنگ میل ثابت ہوگا۔
