سندھ حکومت نے صوبے میں ماہی گیری کے شعبے کو فروغ دینے اور ساحلی علاقوں میں معاشی سرگرمیوں کو بڑھانے کے لیے کیٹی بندر اور شاہ بندر میں منی فِش ہاربرز قائم کرنے کا فیصلہ کیا ہے۔
وزیرِ اعلیٰ سندھ مراد علی شاہ سے وزیرِ ماہی گیری محمد علی ملکانی اور سیکرٹری ماہی گیری کی ملاقات ہوئی، جس کے دوران دونوں مقامات پر منی فِش ہاربرز کے قیام کے منصوبے کی منظوری دی گئی۔
وزیرِ اعلیٰ مراد علی شاہ کا کہنا تھا کہ کیٹی بندر اور شاہ بندر ماضی میں سندھ کی اہم قدرتی بندرگاہیں رہی ہیں، اور ان مقامات کی بحالی سے صوبے میں مالی استحکام، روزگار کے نئے مواقع اور مقامی معیشت میں نمایاں بہتری آئے گی۔
انہوں نے کہا کہ دونوں اضلاع جغرافیائی طور پر شہر کے قریب واقع ہیں اور موٹر وے و نیشنل ہائی وے سے براہِ راست منسلک ہیں، جس سے نقل و حمل اور تجارتی سرگرمیوں میں آسانی پیدا ہوگی۔
وزیرِ اعلیٰ نے مزید کہا کہ یہ منصوبہ سندھ کے ماحولیاتی طور پر مستحکم اور پائیدار ترقیاتی وژن کا ایک اہم حصہ ہے، جس کے تحت صوبے میں ماہی گیری کے شعبے کو جدید خطوط پر استوار کیا جا رہا ہے۔
ان کے مطابق منصوبے کے پہلے مرحلے میں منی فِش ہاربرز تعمیر کیے جائیں گے، جب کہ دوسرے مرحلے میں انہیں مکمل بندرگاہوں کی شکل دی جائے گی۔
حکومت سندھ کا کہنا ہے کہ یہ منصوبے نہ صرف ماہی گیری اور تجارت کے لیے فائدہ مند ثابت ہوں گے بلکہ سیاحت کے فروغ اور ساحلی کمیونٹیز کی معاشی بہتری میں بھی کلیدی کردار ادا کریں گے۔
