دوحہ: قطر کی وزارت خارجہ نے اعلان کیا ہے کہ پاکستان اور افغانستان کے درمیان فوری جنگ بندی پر اتفاق ہو گیا ہے۔
قطری وزارت خارجہ کے مطابق یہ اہم پیش رفت دوحہ میں ہونے والے مذاکرات کے دوران سامنے آئی، جس میں دونوں ممالک نے فوری طور پر جنگ بندی پر رضامندی ظاہر کی۔ قطر اور ترکیے کی ثالثی میں ہونے والے ان مذاکرات میں مستقبل میں امن و استحکام کے لیے ایک مستقل مکینزم تشکیل دینے پر بھی اتفاق کیا گیا۔
بیان میں مزید کہا گیا ہے کہ پاکستان اور افغانستان کے درمیان ہونے والی یہ جنگ بندی خطے میں پائیدار امن کے قیام کے لیے مضبوط بنیاد فراہم کرے گی۔ قطر کو امید ہے کہ اس معاہدے سے دونوں ممالک کے درمیان سرحدی کشیدگی کے خاتمے اور بہتر تعلقات کی راہ ہموار ہو گی۔
یاد رہے کہ گزشتہ روز قطری انٹیلی جنس چیف عبداللہ بن محمد الخلیفہ کی میزبانی میں مذاکرات کا پہلا دور دوحہ میں مکمل ہوا تھا۔ پاکستانی وفد کی قیادت وزیر دفاع خواجہ آصف نے کی جبکہ سکیورٹی حکام نے بھی ان کی معاونت کی۔
افغانستان کی جانب سے مذاکراتی وفد کی سربراہی وزیر دفاع ملا محمد یعقوب نے کی۔
واضح رہے کہ جمعے کے روز پاکستان اور افغان طالبان رجیم کے درمیان فائر بندی میں مزید توسیع پر بھی اتفاق کیا گیا تھا، جس کے بعد دوحہ مذاکرات کو دونوں ممالک کے تعلقات میں ایک اہم موڑ قرار دیا جا رہا ہے۔
