لاہور: وزیراعلیٰ پنجاب مریم نواز نے کہا ہے کہ سیلاب متاثرین کی مدد کے لیے ہم نے کوئی رونا دھونا نہیں مچایا اور نہ ہی کسی سے کوئی مدد مانگی ہے۔
اوکاڑہ میں سیلاب متاثرین میں فلڈ کارڈ کی تقسیم کی تقریب سے خطاب کرتے ہوئے مریم نواز نے کہا کہ آج سے سیلاب متاثرین کی باقاعدہ بحالی کا آغاز ہو رہا ہے اور متاثرین کا 70 فیصد سروے مکمل ہو چکا ہے۔ ان کا کہنا تھا کہ جب تک متاثرین کا شفاف سروے مکمل نہیں ہوگا، کوئی فیصلہ نہیں ہوگا۔
انہوں نے بتایا کہ آج سے 15 اضلاع میں سیلاب متاثرین کو چیک کی تقسیم شروع ہو رہی ہے اور اس کے لیے 100 ارب روپے مختص کیے گئے ہیں۔ متاثرین کے علاوہ کسی کو ایک پیسہ نہیں ملے گا اور کرپشن کے تمام راستے بند کر دیے گئے ہیں۔
وزیراعلیٰ پنجاب نے مزید کہا کہ متاثرین کی مدد کے لیے میں نے بیرونی دنیا کے سامنے ہاتھ نہیں پھیلائے اور کسی سے کوئی مدد نہیں مانگی، پنجاب کی عوام کی عزت نفس کا خیال رکھا گیا اور میرے ہوتے ہوئے کسی کو بھی میلی آنکھ سے دیکھنے کی اجازت نہیں ہے۔
