اسلام آباد کی ڈسٹرکٹ اینڈ سیشن کورٹ میں جوڈیشل مجسٹریٹ مبشر حسن نے شراب اور اسلحہ برآمدگی کیس کی سماعت کی، تاہم کیس کال ہونے کے باوجود علی امین گنڈاپور عدالت میں پیش نہ ہوئے۔ عدالت نے ان کی مسلسل غیر حاضری پر برہمی کا اظہار کرتے ہوئے ان کے ناقابلِ ضمانت وارنٹ گرفتاری جاری کر دیے۔
عدالتی حکم نامے میں پولیس کو ہدایت کی گئی ہے کہ علی امین گنڈاپور کو گرفتار کر کے آئندہ سماعت پر عدالت کے روبرو پیش کیا جائے۔ عدالت نے مقدمے کی اگلی سماعت 28 اکتوبر تک ملتوی کر دی۔
واضح رہے کہ علی امین گنڈاپور کے خلاف شراب اور اسلحہ برآمدگی کا مقدمہ اسلام آباد کے تھانہ بارہ کہو میں درج ہے، جہاں ان پر غیر قانونی اسلحہ رکھنے اور شراب برآمد ہونے کے الزامات عائد کیے گئے تھے۔ کیس میں پہلے بھی متعدد مرتبہ انہیں عدالت میں پیش ہونے کے سمن جاری کیے جا چکے ہیں۔
