لاہور: صوبائی دارالحکومت کے علاقے چوہنگ میں شہریوں نے ایک شخص کو چور سمجھ کر بہیمانہ تشدد کا نشانہ بنا ڈالا۔
پولیس کے مطابق منیر نامی شخص پر چوری کا شبہ ظاہر کیا گیا، جس کے بعد مقامی افراد نے اسے پکڑ کر تشدد کیا۔ مشتعل ہجوم نے نہ صرف منیر کو زنجیروں میں جکڑ دیا بلکہ اس کے بال بھی کاٹ دیے۔
واقعے کی اطلاع ملنے پر پولیس موقع پر پہنچ گئی اور صورتحال کو قابو میں کیا۔ پولیس کے مطابق مشتبہ چور منیر کے ساتھ ساتھ اس پر تشدد کرنے والے متعدد افراد کو بھی حراست میں لے لیا گیا ہے۔
ترجمان پولیس کا کہنا ہے کہ واقعے کی تحقیقات جاری ہیں اور اس حوالے سے تمام پہلوؤں کا جائزہ لیا جا رہا ہے۔ پولیس نے شہریوں سے اپیل کی ہے کہ قانون کو اپنے ہاتھ میں لینے کے بجائے کسی بھی مشتبہ شخص کے بارے میں فوراً پولیس کو اطلاع دیں تاکہ انصاف کے تقاضے پورے کیے جا سکیں۔
