میلبرن سے موصولہ اطلاعات کے مطابق انگلینڈ کے خلاف ایشز سیریز سے قبل آسٹریلین کرکٹ ٹیم کو ایک بڑا دھچکا لگا ہے، کیونکہ ٹیم کے کپتان پیٹ کمنز انجری کے باعث پہلے ٹیسٹ میچ سے باہر ہو گئے ہیں۔
کرکٹ آسٹریلیا نے تصدیق کی ہے کہ پیٹ کمنز پہلے ایشز ٹیسٹ کے لیے وقت پر مکمل طور پر فٹ نہیں ہو سکیں گے۔ بورڈ کے مطابق ان کی غیر موجودگی میں تجربہ کار بلے باز اسٹیو اسمتھ ٹیم کی قیادت کریں گے۔
ترجمان کرکٹ آسٹریلیا کے مطابق پیٹ کمنز نے بحالی کے عمل کے دوران دوڑنے کی مشقیں شروع کر دی ہیں اور توقع ہے کہ وہ جلد بولنگ کا آغاز بھی کر دیں گے۔ تاہم میڈیکل اسٹاف کا خیال ہے کہ انہیں مکمل صحت یابی کے لیے کچھ وقت درکار ہے تاکہ وہ باقی سیریز میں بغیر کسی خطرے کے حصہ لے سکیں۔
پانچ ٹیسٹ میچوں پر مشتمل ایشز سیریز کا پہلا میچ 21 نومبر سے پرتھ میں کھیلا جائے گا۔ آسٹریلوی ٹیم انتظامیہ کو امید ہے کہ پیٹ کمنز دوسرے ٹیسٹ سے قبل مکمل فٹ ہو جائیں گے اور ٹیم میں واپسی ممکن ہوگی۔
واضح رہے کہ پیٹ کمنز نے گزشتہ چند برسوں میں بطور کپتان شاندار کارکردگی دکھائی ہے اور ان کی قیادت میں آسٹریلیا نے ورلڈ ٹیسٹ چیمپئن شپ سمیت کئی اہم فتوحات حاصل کی ہیں۔ ان کی غیر موجودگی ٹیم کے لیے ایک بڑا نقصان تصور کیا جا رہا ہے، تاہم اسٹیو اسمتھ کا تجربہ آسٹریلیا کے لیے حوصلہ افزا ثابت ہو سکتا ہے۔
