محکمہ اسکولز ایجوکیشن پنجاب نے اسموگ کی شدت میں اضافے کے باعث صوبے بھر میں اسکولوں کے اوقات کار تبدیل کر دیے ہیں۔
محکمہ کی جانب سے جاری نوٹیفکیشن کے مطابق پیر سے جمعرات تک اسکول صبح پونے 9 بجے کھلیں گے اور دوپہر ڈیڑھ بجے تک جاری رہیں گے، جبکہ جمعہ کے روز اسکولوں کے اوقات صبح پونے 9 بجے سے دوپہر ساڑھے 12 بجے تک ہوں گے۔
اس سے قبل صوبائی وزیر تعلیم رانا سکندر حیات نے بھی سوشل میڈیا پر اسموگ کے پیش نظر اسکولوں کے اوقات میں تبدیلی کا اعلان کیا تھا۔ ان کا کہنا تھا کہ بڑھتی ہوئی آلودگی کے باعث بچوں کی صحت کو لاحق خطرات کے پیش نظر اوقات میں تبدیلی ناگزیر تھی۔
دوسری جانب سینئر صوبائی وزیر مریم اورنگزیب نے کہا ہے کہ بھارت کی جانب سے آنے والی ہواؤں کے باعث لاہور آلودگی کے لحاظ سے سب سے زیادہ متاثر ہوتا ہے۔ ان کے مطابق حکومت نے اسموگ سے بچاؤ کے لیے متعدد سخت اقدامات کیے ہیں جن پر عملدرآمد جاری ہے۔
ادھر لاہور سمیت پنجاب کے وسطی علاقوں میں فضائی آلودگی خطرناک حد تک بڑھ چکی ہے، جس کے باعث کھلی فضا میں سانس لینا انسانی صحت کے لیے نقصان دہ بن گیا ہے۔
لاہور کے علاقے راوی روڈ میں صبح کے اوقات میں ایئر کوالٹی انڈیکس 810 تک ریکارڈ کیا گیا، جو انسانی صحت کے لیے انتہائی خطرناک سطح تصور کی جاتی ہے۔
ماہرین نے شہریوں کو مشورہ دیا ہے کہ وہ غیر ضروری طور پر گھر سے باہر نہ نکلیں، ماسک کا استعمال یقینی بنائیں اور بچوں و بزرگوں کو خصوصی طور پر اسموگ سے بچاؤ کے اقدامات اختیار کرنے کی ہدایت کی ہے۔
