اسلام آباد میں حکومت نے ملک کی پرائم نیشنل سائبر کرائم انویسٹی گیشن ایجنسی میں مبینہ طور پر سرگرم سائبر کرائم مافیا کے خلاف بڑے پیمانے پر کارروائی کی تیاری مکمل کر لی ہے۔ ذرائع کے مطابق اس کارروائی کو ادارے کی ’’سرجری‘‘ قرار دیا جا رہا ہے تاکہ ایجنسی کے اندر موجود بدعنوان عناصر کا خاتمہ اور نظام کو شفاف بنایا جا سکے۔
ذرائع کا کہنا ہے کہ ابتدائی مرحلے میں اعلیٰ سطح پر تقرریوں اور تبادلوں کا فیصلہ کیا گیا ہے۔ اس سلسلے میں سینئر پولیس افسر سید خرم علی کو اہم عہدے کی ذمہ داری سونپی جا رہی ہے تاکہ ادارے کے نظم و نسق کو بہتر بنایا جا سکے اور بدعنوانی کے خاتمے کی راہ ہموار ہو۔
رپورٹس کے مطابق ایجنسی کے کئی افسران کے خلاف انضباطی کارروائی کا آغاز کیا جا رہا ہے، جن پر کرپشن، مالی بدعنوانی، اختیارات کے ناجائز استعمال اور غیر قانونی سرگرمیوں کے الزامات ہیں۔ بعض افسران کو ملازمت سے برطرف کرنے جبکہ دیگر کے خلاف فوجداری تحقیقات کا آغاز کیے جانے کا امکان ہے۔
ذرائع کے مطابق تحقیقات میں خاص توجہ بھرتیوں میں بے ضابطگیوں، اسامیوں کی اپ گریڈیشن میں فراڈ، جعلی دستاویزات کی بنیاد پر ترقیاں دینے اور ماضی کی مشکوک انکوائریوں پر مرکوز ہوگی۔ اس کے علاوہ ان افسران کے غیر ملکی دوروں، بیرون ملک رقوم کی منتقلی اور مشتبہ ڈیجیٹل لین دین کی بھی جانچ پڑتال کی جائے گی۔
حکام نے بتایا کہ تحقیقات کے دوران افسران کے ممکنہ طور پر کرپٹو کرنسی اور دیگر ڈیجیٹل اثاثوں میں سرمایہ کاری کے شواہد کا بھی جائزہ لیا جائے گا، جنہیں مبینہ طور پر ذاتی یا جعلی اکاؤنٹس کے ذریعے منتقل کیا گیا ہے۔
ذرائع کے مطابق حکومت اس بار ان تحقیقات کو ایسے افسران کے سپرد کر رہی ہے جن کی شہرت دیانت دار اور غیر جانبدار افسران کے طور پر ہے، تاکہ کسی دباؤ یا اثر و رسوخ کے بغیر کارروائی مکمل کی جا سکے۔
ایک سینئر افسر نے بتایا کہ اس بار تحقیقات وہ افسران کریں گے جن تک رسائی ممکن نہیں، اور جو اپنی غیر جانبداریت اور شفافیت کے باعث پہچانے جاتے ہیں۔
ذرائع کے مطابق حکومت کا مقصد ادارے کو مکمل طور پر ازسرنو منظم کرنا اور اندرونی مافیا کے اثرات ختم کرکے ایجنسی کو اپنی اصل ذمہ داری یعنی ملک میں سائبر جرائم کے خلاف مؤثر کارروائی پر دوبارہ مرکوز کرنا ہے۔
