اسلام آباد: ماحول کی بہتری کے لیے کام کرنے والی عالمی تنظیم گرین کلائمیٹ فنڈ نے پاکستان کے لیے 25 کروڑ ڈالر کی امداد کی منظوری دے دی ہے۔
ایشین ڈویلپمنٹ بینک (اے ڈی بی) کے جاری کردہ اعلامیے کے مطابق یہ امدادی رقم "گلیشیئرز ٹو فارمز” منصوبے کے لیے استعمال کی جائے گی۔ منصوبے کا مقصد برفانی تودوں سے بننے والے آبی ذخائر اور ان کے بہاؤ کو ماحولیاتی تبدیلیوں کے اثرات سے محفوظ بنانا ہے تاکہ پانی کے قدرتی نظام کو پائیدار بنایا جا سکے۔
اعلامیے میں کہا گیا ہے کہ اس منصوبے کے تحت خیبر پختونخوا کے ضلع سوات میں کسانوں کو جدید آبپاشی کے نظام، پانی کے مؤثر استعمال اور زرعی پیداوار میں اضافے کی سہولیات فراہم کی جائیں گی۔
گرین کلائمیٹ فنڈ کی یہ مالی معاونت پاکستان میں بڑھتے ہوئے ماحولیاتی چیلنجز، گلیشیئر پگھلنے، اور پانی کی قلت سے نمٹنے کے لیے ایک اہم قدم قرار دی جا رہی ہے۔
واضح رہے کہ منصوبے کی تکمیل ایشیائی ترقیاتی بینک کی تکنیکی و مالی معاونت سے کی جائے گی، جس کے ذریعے پاکستان کے شمالی پہاڑی علاقوں میں ماحولیاتی تحفظ اور زرعی استحکام کے لیے عملی اقدامات کیے جائیں گے۔
