مظفرآباد: وزیراعظم آزاد کشمیر چوہدری انوار الحق نے استعفیٰ دینے کے لیے مشروط آمادگی ظاہر کردی ہے۔
ذرائع کے مطابق چوہدری انوار الحق نے اپنے حامی وزراء اور اراکین اسمبلی کے ترقیاتی فنڈز اور جاری منصوبوں کی تکمیل کی ضمانت مانگی ہے۔ انہوں نے کہا ہے کہ اگر ن لیگ کے وزراء اور ٹکٹ ہولڈرز کو آئندہ انتخابات سے قبل برابری کی بنیاد پر فنڈز فراہم کیے جائیں تو وہ مستعفی ہونے پر غور کریں گے۔
ذرائع کا کہنا ہے کہ وزیراعظم نے واضح کر دیا ہے کہ ترقیاتی اسکیموں اور مالی تقسیم میں کسی جماعت کے ساتھ امتیازی سلوک نہیں ہونا چاہیے۔
یاد رہے کہ پیپلز پارٹی اور مسلم لیگ (ن) وزیراعظم چوہدری انوار الحق کے خلاف تحریک عدم اعتماد پر متفق ہوچکی ہیں۔ ذرائع کے مطابق پیپلز پارٹی کو اس وقت 36 اراکین کی حمایت حاصل ہے جو تحریک کی کامیابی کے لیے درکار اکثریت سے زیادہ ہے۔
دوسری جانب چوہدری انوار الحق نے اب تک وزارتِ عظمیٰ سے استعفیٰ نہیں دیا۔ ان کا کہنا ہے کہ اگر اپوزیشن کے پاس مطلوبہ نمبرز موجود ہیں تو وہ تحریک عدم اعتماد اسمبلی میں پیش کر دے۔
