مظفر آباد: وزیراعظم آزاد کشمیر چوہدری انوار الحق کے خلاف تحریک عدم اعتماد کے معاملے پر پاکستان پیپلز پارٹی اور مسلم لیگ (ن) کے درمیان ڈیڈلاک ختم ہوگیا ہے۔
ذرائع کے مطابق مسلم لیگ (ن) نے قبل از وقت انتخابات کی شرط پر وزیراعظم انوار الحق کے خلاف تحریک عدم اعتماد میں پیپلز پارٹی کی حمایت کی یقین دہانی کرادی ہے۔
ذرائع کا کہنا ہے کہ اگر تحریک کامیاب ہوگئی تو نیا وزیراعظم آئینی عہدوں پر زیر التواء تقرریاں مکمل کرے گا اور عام انتخابات کے انعقاد کے لیے راہ ہموار کرے گا۔
ذرائع کے مطابق تحریک عدم اعتماد جمع ہونے کے بعد مسلم لیگ (ن) کے وزراء اپنے عہدوں سے استعفیٰ دے دیں گے، اور عدم اعتماد میں ووٹ ڈالنے کے بعد ن لیگ کے ارکان اپوزیشن بینچوں پر بیٹھ جائیں گے۔
ذرائع نے بتایا کہ اگر وزیراعظم چوہدری انوار الحق نے ازخود استعفیٰ نہ دیا تو کسی بھی وقت تحریک عدم اعتماد اسمبلی میں پیش کی جائے گی۔
واضح رہے کہ وزیراعظم کے خلاف تحریک عدم اعتماد کی کامیابی کے لیے 27 اراکین کی سادہ اکثریت درکار ہے، جبکہ مسلم لیگ (ن) کی حمایت کے بعد پیپلز پارٹی کا دعویٰ ہے کہ اسے اب 36 اراکین کی حمایت حاصل ہوچکی ہے۔
