دوحہ: صدرِ مملکت آصف علی زرداری نے امیرِ قطر شیخ تمیم بن حمد الثانی سے دوحہ میں ملاقات کی، جس میں چیئرمین پیپلز پارٹی بلاول بھٹو زرداری اور پاکستانی سفیر بھی شریک تھے۔ ملاقات کے دوران صدر زرداری نے امیرِ قطر کو حکومتِ پاکستان اور عوام کی جانب سے نیک تمناؤں کا پیغام پہنچایا۔
اعلامیے کے مطابق، دونوں رہنماؤں نے پاکستان اور قطر کے تاریخی اور برادرانہ تعلقات کو مزید مضبوط بنانے کے عزم کا اظہار کیا۔ اس موقع پر امیرِ قطر نے پاکستان اور سعودی عرب کے حالیہ دفاعی معاہدے کو *خوش آئند اور بروقت* قرار دیا۔
صدر زرداری نے قطر کے دوحہ مذاکرات میں افغانستان سے متعلق مثبت کردار کو سراہا، جب کہ امیرِ قطر نے امید ظاہر کی کہ پاکستان افغانستان کے موجودہ مسائل کو حل کرکے علاقائی استحکام میں کردار ادا کرے گا۔
صدرِ مملکت نے دفاع، دفاعی پیداوار، زراعت اور غذائی تحفظ کے شعبوں میں تعاون بڑھانے کی تجویز پیش کی، جس پر امیرِ قطر نے فوری طور پر متعلقہ حکام کو رابطے بڑھانے کی ہدایت دیتے ہوئے مکمل تعاون کا یقین دلایا۔
اعلامیے کے مطابق، شیخ تمیم بن حمد الثانی نے قطر میں پاکستانی کمیونٹی کے کردار کی تعریف کرتے ہوئے ان کی تعداد میں اضافے کی خواہش ظاہر کی۔ انہوں نے کہا کہ پاکستان ایک منفرد حیثیت رکھتا ہے جو چین، مغرب اور خلیجی ممالک سے بیک وقت مضبوط تعلقات رکھتا ہے، اور قطر کو پاکستان اور اس کی کامیابیوں پر فخر ہے۔
ملاقات کے اختتام پر صدر آصف علی زرداری نے امیرِ قطر کو پاکستان کے دورے کی دعوت دی، جسے امیرِ قطر نے قبول کرتے ہوئے اعلان کیا کہ وہ آئندہ سال کے اوائل میں پاکستان کا دورہ کریں گے۔
