عالمی شہرت یافتہ فٹ بالر رونالڈو کا جلد ریٹائر منٹ کا اعلان

ریاض: عالمی فٹ بال اسٹار کرسٹیانو رونالڈو نے اعلان کیا ہے کہ وہ جلد فٹ بال سے ریٹائرمنٹ لینے جا رہے ہیں، اور ان کے اس فیصلے کی بنیادی وجہ اپنی فیملی کے ساتھ زیادہ وقت گزارنا ہے۔

چالیس سالہ رونالڈو نے ایک حالیہ انٹرویو میں بتایا کہ وہ کئی برسوں سے اپنے ریٹائرمنٹ کے بعد کی زندگی کے بارے میں سنجیدگی سے سوچ رہے ہیں۔ ان کا کہنا تھا کہ فٹ بال سے کنارہ کشی ان کے لیے ایک مشکل فیصلہ ہوگا، لیکن وہ اس کے لیے ذہنی طور پر تیار ہیں۔

رونالڈو، جو اب تک کلب اور قومی ٹیم کے لیے مجموعی طور پر 952 گول کر چکے ہیں، عالمی سطح پر تاریخ کے سب سے بڑے گول اسکورر ہیں۔ گزشتہ ماہ انہوں نے عندیہ دیا تھا کہ وہ 1,000 گولز کا ہدف حاصل کرنے کے بعد فٹ بال کو خیرباد کہیں گے۔

انٹرویو کے دوران انہوں نے کہا، “میں سمجھتا ہوں کہ میں اس فیصلے کے لیے تیار ہوں۔ یہ یقیناََ ایک مشکل لمحہ ہوگا، لیکن میں نے 25 یا 26 سال کی عمر سے ہی اس دن کے لیے تیاری شروع کر دی تھی۔ مجھے یقین ہے کہ میں اس دباؤ کو برداشت کر سکوں گا۔”

کرسٹیانو رونالڈو نے اعتراف کیا کہ گول کرنے کا جوش اور نیا ریکارڈ بنانے کی توانائی بے مثال ہے، تاہم زندگی میں ہر سفر کا ایک آغاز اور ایک اختتام ہوتا ہے۔

انہوں نے مزید کہا، “اب وقت ہے کہ میں اپنے لیے، اپنی فیملی کے لیے اور اپنے بچوں کی پرورش کے لیے زیادہ وقت نکالوں۔ فٹ بال نے مجھے وہ سب کچھ دیا جس کا میں نے خواب دیکھا تھا، اب میں اپنی زندگی کے اگلے باب کی طرف بڑھنے کے لیے تیار ہوں۔”