نیویارک: نیویارک کے نومنتخب میئر اور ڈیموکریٹک سوشلسٹ رہنما ظہران ممدانی سابق پاکستانی کرکٹر اور کمنٹیٹر رمیز راجہ کے مداح نکلے۔
34 سالہ ظہران ممدانی کی میئر شپ جیتنے کے بعد ان کی انتخابی مہم کی ایک ویڈیو سوشل میڈیا پر وائرل ہو رہی ہے، جس میں وہ اپنی ٹیم سے خطاب کرتے ہوئے رمیز راجہ کا حوالہ دیتے نظر آ رہے ہیں۔ ویڈیو میں ممدانی اپنے کارکنوں کا حوصلہ بڑھانے کے لیے رمیز راجہ کا مشہور جملہ دہراتے ہیں: “To snatch defeat from the jaws of victory” (یعنی فتح کے قریب پہنچ کر شکست کھینچ لینا)۔ اس جملے کا استعمال رمیز راجہ عموماً کرکٹ میچوں میں تبصرے کے دوران کرتے رہے ہیں۔
وائرل ویڈیو دیکھنے کے بعد سابق کرکٹر اور پاکستان کرکٹ بورڈ کے سابق چیئرمین رمیز راجہ نے بھی مائیکرو بلاگنگ پلیٹ فارم "ایکس” پر یہ ویڈیو ری شیئر کی اور ظہران ممدانی کو نیویارک سٹی کا میئر بننے پر مبارکباد دی۔ رمیز راجہ نے اپنے پیغام میں لکھا: “بہت بہت مبارک ہو مسٹر ممدانی! اور کمنٹری سے محبت رکھنے کا شکریہ۔ آپ نے سیدھے بلے سے کھیل کر اُن لوگوں کو بے نقاب کیا جو کرکٹ نہیں کھیلتے۔ آپ پر فخر ہے!”
رمیز راجہ کے اس پیغام پر دنیا بھر سے کرکٹ شائقین نے دلچسپ تبصرے کیے۔ کئی صارفین نے لکھا کہ "رمیز راجہ کی کمنٹری اب امریکی سیاست تک پہنچ گئی”، جب کہ کچھ نے ظہران ممدانی کو “کرکٹ اسپریٹ رکھنے والا میئر” قرار دیا۔ ممدانی کی سیاسی مہم میں یہ ویڈیو نہ صرف ان کے کرکٹر فین ہونے کی علامت بنی بلکہ دنیا بھر میں ان کی شخصیت کا نرم، مزاحیہ اور دوستانہ پہلو بھی نمایاں کر گئی۔
