پاکستان کے انٹرنیشنل کرکٹر حسن نواز کے ہاں بیٹے کی ولادت ہوئی ہے، جس پر قومی اور مقامی میڈیا میں خوشی کی لہر ہے
نیوزی لینڈ کے خلاف ٹی20 سیریز میں شاندار تیز ترین سنچری اسکور کرنے والے 22 سالہ نوجوان اوپنر حسن نواز کے نومولود بیٹے کا نام محمد ابراہیم رکھا گیا ہے۔ حسن نواز نے سوشل میڈیا پر اپنے بیٹے کی خوشی کا اعلان کرتے ہوئے مداحوں اور دوستوں کو خوشخبری سے آگاہ کیا۔
واضح رہے کہ حسن نواز کی حالیہ کارکردگی میں قومی ٹیم کے لیے شاندار کھیل شامل ہے، لیکن سلیکشن کمیٹی نے شارجہ کے تین ملکی ٹورنامنٹ، ایشیا کپ، جنوبی افریقا کی ٹی ٹوئنٹی اور ون ڈے سیریز میں مسلسل کمزور کارکردگی کے بعد انہیں سری لنکا کے خلاف سیریز کے لیے ٹیم سے باہر کر کے فخر زمان کو شامل کیا ہے۔
پی سی بی کے ذرائع کے مطابق حسن نواز کو قائد اعظم ٹرافی کے ساتویں مرحلے میں حصہ لینے کی ہدایت دی گئی ہے، جو 11 نومبر سے شروع ہوگا۔ ذرائع کا کہنا ہے کہ اس ٹورنامنٹ میں حسن نواز دوبارہ اپنی فارم میں واپس آ کر قومی ٹیم کے لیے اپنی جگہ مضبوط کرنے کی کوشش کریں گے۔
