اسلام آباد: وفاقی دارالحکومت میں ڈسٹرکٹ کورٹس کمپلیکس کی سکیورٹی بڑھانے کا فیصلہ کیا گیا ہے۔
ڈسٹرکٹ کورٹس کمپلیکس میں سکیورٹی سے متعلق اجلاس ہوا، جس میں اسلام آباد ہائیکورٹ کے ججز جسٹس اعظم خان، جسٹس انعام امین منہاس، ڈسٹرکٹ اینڈ سیشن ججز، اور ہائیکورٹ بار کے صدر واجد گیلانی شریک ہوئے۔ اس کے علاوہ ڈی آئی جی سکیورٹی اور اے آئی جی اسپیشل برانچ نے سکیورٹی انتظامات پر بریفنگ دی۔
ذرائع کے مطابق اجلاس میں کمپلیکس کے داخلی دروازے پر واک تھرو گیٹ کے ساتھ اسکینرز نصب کرنے کا فیصلہ کیا گیا ہے، جس کے بعد سائلین اپنے سامان کو اسکینرز سے سکیورٹی کلیئرنس کے بعد ساتھ لے جا سکیں گے۔ اجلاس میں انٹری گیٹ کے ساتھ زگ زیگ گرل لگانے کا فیصلہ بھی کیا گیا ہے۔
اسی طرح ڈسٹرکٹ کورٹس کمپلیکس کی چھتوں پر اسنائپرز تعینات کرنے کی تجویز دی گئی ہے اور کسی بھی ہنگامی صورتحال سے نمٹنے کے لیے وکلا کو ٹریننگ اور فرضی مشق کروائی جائے گی۔ ذرائع کے مطابق کمپلیکس کی سکیورٹی پر تعینات اہلکاروں کے موبائل فون کے غیر ضروری استعمال پر پابندی ہوگی اور ایک ایمبولینس کمپلیکس کے باہر مستقل کھڑی رکھنے کی تجویز بھی دی گئی ہے۔
