ایشیا کپ رائزنگ اسٹارز میں پاکستان شاہینز نے بھارت اے کو شکست دے کر سیمی فائنل کے لیے کوالیفائی کر لیا۔
قطر کے دارالحکومت دوحا میں کھیلے گئے گروپ میچ میں پاکستان شاہینز نے ٹاس جیت کر پہلے فیلڈنگ کا فیصلہ کیا۔ بھارت اے کی ٹیم پہلے کھیلتے ہوئے 19 اوورز میں 136 رنز بنا کر آؤٹ ہو گئی۔ بھارت اے کی جانب سے سوریاونسی نے 45 اور نمن دھیر نے 35 رنز بنائے، جبکہ آخری 8 وکٹیں صرف 45 رنز کے اضافے پر گریں۔
پاکستان شاہینز کی طرف سے شاہد عزیز نے 24 رنز دے کر 3 وکٹیں حاصل کیں۔ معاذ صداقت اور سعد مسعود نے دو دو وکٹیں حاصل کیں، جبکہ سفیان مقیم، عبید شاہ اور احمد دانیال نے ایک ایک کھلاڑی کو آؤٹ کیا۔
جواب میں پاکستان شاہینز نے معاذ صداقت کی شاندار بیٹنگ کی بدولت 13.2 اوورز میں صرف 2 وکٹوں کے نقصان پر 137 رنز کا ہدف حاصل کر لیا۔ معاذ صداقت نے 47 گیندوں پر 79 رنز کی ناقابل شکست اننگز کھیلی، جس میں 7 چوکے اور 4 چھکے شامل تھے۔ محمد فائق 16 رنز کے ساتھ ناٹ آؤٹ رہے، جبکہ محمد نعیم اور یاسر نے بالترتیب 14 اور 11 رنز بنائے۔
یہ ٹورنامنٹ میں پاکستان شاہینز کی دوسری کامیابی ہے۔ پاکستان شاہینز اپنا تیسرا اور آخری گروپ میچ 18 نومبر کو متحدہ عرب امارات کے خلاف کھیلے گی۔
