راولپنڈی میں پولیس نے اڈیالہ جیل کے قریب گورکھپور ناکے پر آپریشن کرتے ہوئے پاکستان تحریک انصاف (پی ٹی آئی) کے دھرنے کو ختم کر دیا۔ اس موقع پر پی ٹی آئی کے بانی عمران خان کی ہمشیرہ علیمہ خان، نورین نیازی اور عظمیٰ خان کو بھی رہا کیا گیا۔
اطلاعات کے مطابق علیمہ خان نے اڈیالہ روڈ پر دھرنا ختم کرنے سے انکار کر دیا تھا، جس کے بعد پولیس نے آپریشن کرتے ہوئے علیمہ خان سمیت 8 سے 10 کارکنوں کو تحویل میں لے کر قیدی وین میں ڈال دیا۔ اس دوران نورین نیازی کی طبیعت بھی خراب ہوئی۔
پولیس نے دھرنے کے دوران سڑک پر پانی کا چھڑکاؤ بھی کیا تاکہ شرکاء کو راستہ خالی کرنے پر مجبور کیا جا سکے۔ بعد ازاں پولیس نے گورکھپور ناکے پر دھرنا ختم کرایا اور تمام گرفتار افراد کو چکری انٹرچینج پر رہا کر دیا گیا۔
خیال رہے کہ پولیس نے اس دن اڈیالہ جیل جانے والا راستہ بند کر دیا تھا اور عمران خان سے کسی رہنما یا فیملی ممبر کو ملاقات کی اجازت نہیں ملی۔ ملاقات کی اجازت نہ ملنے پر علیمہ خان نے احتجاج کے طور پر اڈیالہ روڈ پر دھرنا دے دیا تھا۔
پولیس کی جانب سے متعدد بار مذاکرات کی کوشش کی گئی لیکن علیمہ خان نے دھرنا ختم کرنے سے انکار کر دیا، جس کے بعد کارروائی ضروری قرار دی گئی۔
