کرکٹ میں ایک منفرد واقعہ پیش آیا جب بھارت کے ڈومیسٹک کرکٹر لامابام اجے سنگھ کو بیٹنگ کے دوران گیند کو دو بار ہٹ کرنے کی وجہ سے آؤٹ قرار دیا گیا، جو کرکٹ کے قوانین میں بہت کم دیکھنے کو ملتا ہے۔
بھارتی میڈیا کے مطابق یہ واقعہ رنجی ٹرافی پلیٹ لیگ کے میچ میں پیش آیا، جہاں منی پور کے بیٹر لامابام نے میگھالیہ کے خلاف کھیلتے ہوئے بولر آریان بورا کی گیند پر دفاعی اسٹروک کھیل کر گیند کو روکا، مگر گیند بیٹ سے لگتے ہوئے اسٹمپس کی طرف واپس جانے لگی۔ اسٹمپس بچانے کے لیے بیٹر نے گیند کو دوبارہ بیٹ سے ہٹ کیا، جس پر امپائر نے انہیں ‘ہِٹ دی بال ٹوائس’ کے تحت آؤٹ قرار دیا۔
میدان میں موجود تماشائیوں کے مطابق یہ عمل بظاہر جائز لگ رہا تھا کیونکہ بیٹر کا مقصد صرف وکٹ بچانا تھا، لیکن کرکٹ کے ایم سی سی قوانین کے مطابق شق 34.1.1 کے تحت اگر بیٹر جان بوجھ کر گیند کو بیٹ یا جسم کے کسی حصے سے دوبارہ ہٹائے اور وہ فیلڈر کو گیند چھونے سے پہلے ہو، تو آؤٹ قرار دیا جا سکتا ہے۔ تاہم اگر گیند صرف وکٹ بچانے کے لیے دوسری بار ہٹائی جائے تو بیٹر کو آؤٹ نہیں دیا جائے گا۔
امپائر دھرمیندر بھاردواج کے فیصلے کے بعد نہ بیٹر نے اور نہ ہی کسی نے اس فیصلے پر اعتراض کیا۔ میدان میں موجود ایک آفیشل کے مطابق بیٹر اپنی وکٹ پیڈ سے بھی بچا سکتا تھا، لیکن اس نے بیٹ استعمال کیا، جس پر مخالف ٹیم نے اپیل کی اور فوری طور پر بیٹر کو آؤٹ قرار دیا گیا۔
یہ واقعہ رنجی ٹرافی میں بہت کم دیکھنے کو ملتا ہے، اور اس طرح کا آؤٹ آخری بار 06-2005 میں ریکارڈ کیا گیا تھا۔ مجموعی طور پر صرف چند کھلاڑی ہی اس منفرد طریقے سے آؤٹ ہوئے ہیں، جس سے کرکٹ کے شائقین کے لیے یہ لمحہ نہایت دلچسپ اور نایاب ثابت ہوا۔
