کراچی میں ای چالان کے نفاذ کو 30 روز مکمل ہو گئے ہیں اور اس دوران ٹریفک قوانین کی خلاف ورزی کرنے والوں کے خلاف 93 ہزار سے زائد چالان کیے جا چکے ہیں۔
تفصیلات کے مطابق سب سے زیادہ چالان سیٹ بیلٹ نہ باندھنے پر کیے گئے، جس کی تعداد 57 ہزار 541 ہے۔ موٹر سائیکل سواروں کے ہیلمٹ نہ پہننے پر 22 ہزار 227 چالان جاری کیے گئے۔ ڈمپر، ٹریلر اور واٹر ٹینکر میں نصب ٹریکر کے ذریعے تیز رفتاری پر ایک ہزار 188 چالان ہوئے جبکہ دیگر گاڑیوں کی تیز رفتاری پر 2 ہزار 699 چالان کیے گئے۔
ٹریفک سگنل کی خلاف ورزی پر 3 ہزار 102، فینسی نمبر پلیٹ رکھنے پر 1 ہزار 278، رنگین شیشے والی گاڑیوں کے لیے 1 ہزار 178، اسٹاپ لائن کی خلاف ورزی پر 611 اور رانگ وے گاڑی چلانے پر 426 چالان جاری کیے گئے۔
ٹریفک پولیس کے مطابق سیٹ بیلٹ نہ باندھنے پر 57 کروڑ 54 لاکھ 10 ہزار روپے، ہیلمٹ نہ پہننے پر 11 کروڑ 11 لاکھ 35 ہزار روپے اور رنگین شیشے والی گاڑیوں پر 2 کروڑ 94 لاکھ 50 ہزار روپے جرمانہ عائد کیا گیا ہے۔
