منامہ: وزیراعظم شہباز شریف نے بحرین کے سرمایہ کاروں کو پاکستان میں سرمایہ کاری کی دعوت دیتے ہوئے ہر ممکن سہولت فراہم کرنے کا اعلان کیا ہے۔ بحرین کے دارالحکومت منامہ میں ایک تقریب سے خطاب کرتے ہوئے وزیراعظم نے کہا کہ پاکستان اور بحرین برادر ملک ہیں اور دونوں کے درمیان طویل عرصے سے اسٹریٹیجک شراکت داری قائم ہے۔ ان کا کہنا تھا کہ ان کا بحرین کا دورہ اقتصادی شعبوں میں نئی پیشرفت اور تعاون کو فروغ دینے کے لیے ہے، خاص طور پر زراعت، آئی ٹی، مصنوعی ذہانت، فن ٹیک اور دیگر شعبوں میں۔
شہباز شریف نے کہا کہ بحرین میں پاکستانی کمیونٹی نے ثابت کیا کہ شناخت صرف سرحدوں تک محدود نہیں بلکہ دنیا کے ہر گوشے میں زندہ رہ سکتی ہے۔ انہوں نے بتایا کہ بحرین میں مقیم پاکستانیوں نے گزشتہ مالی سال میں 484 ملین ڈالر کی ترسیلات زر بھیجی ہیں اور بحرین کی اعلیٰ قیادت کے تعاون اور محبت پر دل سے شکرگزار ہیں۔ انہوں نے پاکستانی کمیونٹی سے درخواست کی کہ وہ بحرین کے لیے بہترین سفیر کا کردار ادا کریں۔
وزیراعظم نے بحرین کو مالیاتی ترقی، انسانی مرکزیت اور جدید معیشت کا روشن نمونہ قرار دیتے ہوئے کہا کہ پاکستان بحرین کے تجربات سے سیکھنا چاہتا ہے اور بھرپور تعاون کا خواہاں ہے۔ انہوں نے مزید کہا کہ پاکستان کے پاس افرادی قوت، وسائل، ابھرتی منڈی اور اسٹریٹیجک محل وقوع ہے جبکہ بحرین کے پاس مالیاتی مہارت اور عالمی تجربہ موجود ہے، اور دونوں ملک مل کر عظیم کامیابیاں حاصل کر سکتے ہیں۔
شہباز شریف نے کہا کہ پاکستان معاشی اصلاحات اور نجی شعبے کی قیادت میں ترقی کے نئے دور میں داخل ہو رہا ہے اور وہ بحرین کے سرمایہ کاروں کو دعوت دیتے ہیں کہ پاکستان آئیں اور سرمایہ کاری میں شراکت داری کریں۔ انہوں نے یقین دلایا کہ پاکستان مشترکہ منصوبوں اور کاروباری تعاون کے لیے تمام ممکن سہولتیں فراہم کرے گا۔
وزیراعظم نے پاکستان کی نوجوان آبادی کو ملک کی بڑی طاقت قرار دیا اور بتایا کہ 60 فیصد آبادی 15 سے 30 سال کی عمر کے درمیان ہے، جسے چیلنج اور موقع دونوں قرار دیا جا سکتا ہے۔ نوجوانوں کو آئی ٹی، اے آئی، فنی تربیت اور جدید مہارتوں سے آراستہ کیا جا رہا ہے تاکہ بحرین کے کاروباری اداروں کے ساتھ مل کر نئی اقتصادی راہیں کھولی جا سکیں۔
انہوں نے بتایا کہ پاکستان اور جی سی سی کے درمیان فری ٹریڈ معاہدہ حتمی مراحل میں ہے، جو دونوں ملکوں کے تعلقات کو نئی بلندی دے گا اور سرمایہ کاری کے مواقع کو مزید فروغ دے گا۔
