بورے والا: طالبہ سے مبینہ ہراسانی پر پروفیسر معطل، یونیورسٹی میں داخلہ بند

فیصل آباد زرعی یونیورسٹی سب کیمپس وڑئہ والا میں پروفیسر کی مبینہ ہراسانی، ویڈیو وائرل ہونے پر فوری ایکشن

ورے والا میں فیصل آباد زرعی یونیورسٹی کے سب کیمپس میں پروفیسر کی جانب سے طالبہ کو مبینہ طور پر ہراسانی اور نتائج میں اضافی نمبر دینے کی پیشکش کا سنگین واقعہ سامنے آیا ہے۔ واقعے کی ویڈیو سوشل میڈیا پر وائرل ہوگئی جس کے بعد یونیورسٹی انتظامیہ حرکت میں آگئی۔

یونیورسٹی حکام کے مطابق طالبہ نے 31 اکتوبر کو پروفیسر کے خلاف تحریری شکایت جمع کرائی تھی، جس میں الزام لگایا گیا کہ پروفیسر نے اضافی نمبروں کی پیشکش کے ذریعے اسے ہراساں کیا۔ شکایت موصول ہونے کے بعد معاملہ ہائر ایجوکیشن کمیشن پاکستان کے ویمن ہراسمنٹ یونٹ کو بھجوایا گیا۔

انتظامیہ کے مطابق ویمن ہراسمنٹ یونٹ نے شکایت کا جائزہ لینے کے بعد اسے وائس چانسلر کو بھجوا دیا۔ وائس چانسلر نے فوری ایکشن لیتے ہوئے پروفیسر کو معطل کرنے اور یونیورسٹی میں ان کا داخلہ بند کرنے کے احکامات جاری کر دیے۔ اس کے ساتھ ہی معاملے کی باضابطہ انکوائری کا آغاز بھی کر دیا گیا ہے۔

ادھر سب کیمپس کے پرنسپل نے بھی انکوائری مکمل ہونے تک اپنا استعفا جمع کرا دیا ہے، جسے انتظامیہ نے موصول کر لیا ہے۔

یونیورسٹی حکام کا کہنا ہے کہ ہراسانی کے واقعات پر زیرو ٹالرنس پالیسی اپنائی گئی ہے اور اس معاملے کی مکمل اور شفاف تحقیقات کی جائیں گی تاکہ طالبہ کو انصاف فراہم کیا جا سکے۔