اسلام آباد: ڈی جی آئی ایس پی آر نے کامسیٹس یونیورسٹی اسلام آباد کے اساتذہ اور طلبہ کے ساتھ ایک خصوصی نشست میں شرکت کی، جس میں ملکی داخلی صورتحال، غلط معلومات (مس انفارمیشن اور ڈس انفارمیشن) کے پھیلاؤ اور دیگر اہم قومی امور پر تفصیلی گفتگو کی گئی۔
نشست کے دوران ڈی جی آئی ایس پی آر نے شرکاء کے سوالات کے مفصل اور مدلل جوابات دیے، جبکہ تقریب کے اختتام پر شرکاء نے افواجِ پاکستان کی مادرِ وطن کے لیے لازوال قربانیوں کو خراجِ تحسین پیش کیا۔
شرکاء نے کہا کہ بغیر تحقیق کے غیر مصدقہ معلومات کا پھیلاؤ قومی مفادات کے لیے نقصان دہ ثابت ہو سکتا ہے، اور ایسے آگاہی سیشنز کے ذریعے مس انفارمیشن اور ڈس انفارمیشن کا مؤثر تدارک ممکن ہے۔
نشست میں نوجوانوں کی بھرپور حوصلہ افزائی کی گئی اور انہیں پاکستان کا مستقبل قرار دیا گیا، جس پر طلبہ نے اطمینان کا اظہار کیا کہ ان کے تمام سوالات کے مکمل دلائل کے ساتھ جوابات فراہم کیے گئے۔
شرکاء نے یہ بھی کہا کہ پاکستان کے استحکام، سلامتی اور ترقی کے لیے فوج کے ساتھ ہر شہری کا کردار ناگزیر ہے اور دہشت گردی کے مکمل خاتمے کے لیے تمام اداروں کے درمیان باہمی تعاون اور یکجہتی ضروری ہے۔
نشست کے دوران نوجوانوں میں آگاہی اور شعور اجاگر کرنے کی ضرورت پر زور دیا گیا اور فتنہ الخوارج کے حوالے سے بھی واضح معلومات فراہم کی گئیں۔ شرکاء نے عزم کیا کہ پاک فوج ہم سے ہے اور ہم پاک فوج سے ہیں۔
