بلوچستان کے ضلع ہرنائی کے پہاڑی علاقے سے ملنے والی چار لاشوں میں سے تین کی شناخت ہو گئی ہے، جبکہ ایک لاش کی شناخت تاحال نہیں ہو سکی۔
ضلعی انتظامیہ ہرنائی کے مطابق شہر سے تقریباً 22 کلو میٹر دور زندہ پیر کے مقام پر واقع پہاڑی علاقے سے چار نامعلوم افراد کی لاشیں برآمد ہوئیں۔ اطلاع ملتے ہی ضلعی انتظامیہ اور ریسکیو اہلکار موقع پر پہنچے اور لاشوں کو تحویل میں لیا۔
انتظامیہ کا کہنا ہے کہ مقتولین کے جسموں پر جدید اسلحہ سے فائرنگ کے نشانات پائے گئے ہیں، جس سے قتل کیے جانے کا شبہ ظاہر کیا جا رہا ہے۔ لاشوں کو شناخت اور دیگر قانونی کارروائی کے لیے ہرنائی اسپتال منتقل کیا گیا۔
ضلعی انتظامیہ کے مطابق تین لاشوں کی شناخت نور محمد سکنہ بابر کچ کوٹ منڈئی ضلع سبی، جمعہ خان سکنہ کوریاک سپن تنگی ضلع ہرنائی اور محمد رسول کے نام سے ہو گئی ہے، جبکہ چوتھی لاش کی شناخت کا عمل جاری ہے۔
انتظامیہ نے بتایا کہ اسپتال میں ضروری کارروائی مکمل کرنے کے بعد لاشوں کو مردہ خانے میں رکھ دیا گیا ہے، جبکہ واقعے کی تحقیقات شروع کر دی گئی ہیں تاکہ قتل کی وجوہات اور ذمہ داروں کا تعین کیا جا سکے۔
