لاہور: وزیراعلیٰ پنجاب مریم نواز شریف نے کشمیری عوام کے حقِ خود ارادیت کی بھرپور حمایت کرتے ہوئے کہا ہے کہ آزادی کشمیریوں کا بنیادی حق ہے اور انشاء اللہ کشمیری عوام کی جدوجہد ضرور رنگ لائے گی۔
وزیراعلیٰ پنجاب مریم نواز شریف نے اپنے بیان میں کشمیری عوام کے حقِ خود ارادیت کی غیرمتزلزل حمایت کا اعادہ کرتے ہوئے کہا کہ 5 جنوری 1949 کی اقوام متحدہ کی قرارداد جموں و کشمیر کے عوام کو آزادانہ اور منصفانہ استصوابِ رائے کی مکمل ضمانت دیتی ہے۔ انہوں نے کہا کہ کشمیری عوام گزشتہ 77 برس سے اس وعدے کی تکمیل کے منتظر ہیں جو عالمی برادری نے ان سے کیا تھا، مگر بدقسمتی سے آج تک اس پر عملدرآمد نہیں ہو سکا۔
مریم نواز شریف نے کہا کہ حقِ خود ارادیت انسانی وقار کا بنیادی جزو ہے اور اس سے انحراف نہ صرف انسانی آزادی کے اصولوں کی خلاف ورزی ہے بلکہ انسانی حقوق کے عالمی اعلامیے اور اقوام متحدہ کے انسانی حقوق سے متعلق معاہدوں کی بھی کھلی نفی ہے۔ ان کا کہنا تھا کہ کسی بھی قوم کو اپنے مستقبل کے فیصلے کا حق دینا عالمی انصاف اور امن کے قیام کے لیے ناگزیر ہے۔
وزیراعلیٰ پنجاب نے بھارت کی پالیسیوں پر شدید تنقید کرتے ہوئے کہا کہ بھارت مقبوضہ جموں و کشمیر میں آبادیاتی ڈھانچے کو تبدیل کرنے کی مذموم کوششیں کر رہا ہے، جس کا مقصد کشمیریوں کے تشخص، ثقافت اور شناخت کو مجروح کرنا ہے۔ انہوں نے کہا کہ بھارت نے مقبوضہ جموں و کشمیر کو دنیا کا سب سے بڑا ملٹری زون بنا دیا ہے، جہاں لاکھوں فوجی تعینات کر کے کشمیری عوام کی آواز کو دبانے کی کوشش کی جا رہی ہے۔
مریم نواز شریف کا کہنا تھا کہ طاقت، جبر اور ظلم کے ذریعے کسی قوم کی آزادی کی خواہش کو ختم نہیں کیا جا سکتا۔ انہوں نے واضح الفاظ میں کہا کہ بھارت کو یہ بات ذہن نشین کر لینی چاہیے کہ کوئی بھی دیوار، کوئی بھی رکاوٹ اور کوئی بھی عسکری طاقت کشمیری عوام کے جذبۂ آزادی کو روک نہیں سکتی۔ آزادی کشمیریوں کا بنیادی، فطری اور ناقابلِ تنسیخ حق ہے۔
انہوں نے مزید کہا کہ پاکستان کشمیری عوام کے ساتھ کھڑا ہے اور ان کی سیاسی، اخلاقی اور سفارتی حمایت جاری رکھے گا۔ وزیراعلیٰ پنجاب نے اس عزم کا اظہار کیا کہ کشمیریوں کی قربانیاں رائیگاں نہیں جائیں گی اور ایک دن وہ ضرور آزادی کی منزل حاصل کریں گے۔
