کوئٹہ: دہشت گردی کے خاتمے تک چین سے نہیں بیٹھیں گے، وزیراعظم شہباز شریف
وزیراعظم شہباز شریف نے کہا ہے کہ دہشت گردی کے خلاف جنگ آج بھی پوری شدت کے ساتھ جاری ہے اور خوارج کو ہمسایہ ممالک کی جانب سے مدد فراہم کی جا رہی ہے، تاہم دہشت گردی کے مکمل خاتمے تک حکومت چین سے نہیں بیٹھے گی۔
کوئٹہ میں منعقدہ اجلاس سے خطاب کرتے ہوئے وزیراعظم نے کہا کہ وفاقی حکومت بلوچستان کی ترقی، استحکام اور عوامی فلاح کے لیے صوبائی حکومت کے ساتھ مکمل تعاون جاری رکھے گی۔ انہوں نے اس عزم کا اعادہ کیا کہ بلوچستان کو درپیش مسائل کے حل، ترقیاتی منصوبوں کی تکمیل اور عوام کو ریلیف کی فراہمی کے لیے تمام دستیاب وسائل بروئے کار لائے جائیں گے۔
وزیراعظم شہباز شریف نے بلوچستان حکومت کی جانب سے صوبے میں ترقی کے فروغ، امن و امان کے قیام، سیاسی ہم آہنگی کے استحکام اور وزیراعظم کمپلینٹ سیل میں درج عوامی شکایات کے مؤثر ازالے کے لیے کیے گئے اقدامات کو سراہا۔
اجلاس سے خطاب میں وزیراعظم نے کہا کہ دہشت گردی نے خیبر پختونخوا کی طرح بلوچستان میں بھی سنگین مشکلات پیدا کیں، تاہم معرکۂ حق میں دشمن کو ایسا سبق سکھایا گیا ہے جو وہ ہمیشہ یاد رکھے گا۔ انہوں نے واضح کیا کہ دہشت گردی کے خاتمے تک حکومت کا عزم غیر متزلزل رہے گا۔
اس موقع پر چیف سیکرٹری بلوچستان شکیل قادر خان نے وزیراعظم کو صوبے میں مختلف شعبوں میں جاری اصلاحات، ترقیاتی منصوبوں کی پیش رفت اور بالخصوص تعلیم، صحت، گورننس اور عوامی خدمات کی فراہمی سے متعلق اقدامات پر تفصیلی بریفنگ دی۔
واضح رہے کہ وزیراعظم میاں شہباز شریف آج ایک روزہ دورے پر کوئٹہ پہنچے تھے۔
