بنگلادیش نے بھارت میں مزید 3 سفارتی مشنز کے ویزا سیکشنز بند کر دیے
ڈھاکا: بنگلادیش نے سکیورٹی خدشات کے پیش نظر بھارت میں اپنے مزید 3 اہم سفارتی مشنز کے ویزا سیکشنز عارضی طور پر بند کرنے کا اعلان کر دیا ہے۔
وزارت خارجہ بنگلادیش کے مطابق نئی پابندیاں جمعرات سے نافذ العمل ہو چکی ہیں۔ تازہ فیصلے کے تحت بھارتی شہریوں کے لیے کاروباری اور ملازمت کے ویزوں کے علاوہ تمام اقسام کے ویزے معطل کر دیے گئے ہیں۔
کولکتہ میں بنگلا دیشی ڈپٹی ہائی کمیشن میں قونصلر اور ویزا خدمات مکمل طور پر بند کر دی گئی ہیں، جبکہ ممبئی اور چنئی میں سیاحتی ویزے سمیت دیگر تمام ویزا خدمات بھی معطل کر دی گئی ہیں۔
وزارت خارجہ کے مطابق بھارت میں جن مشنز میں سکیورٹی سے متعلق واقعات پیش آئے وہاں ویزا خدمات معطل کی گئی ہیں، اور یہ فیصلہ مکمل طور پر سکیورٹی وجوہات کی بنیاد پر کیا گیا ہے۔
یاد رہے کہ اس سے قبل 22 دسمبر کو بنگلادیش نے نئی دہلی، اگرتلہ اور سلی گوڑی میں ویزا اور قونصلر خدمات عارضی طور پر معطل کر دی تھیں۔
