ٹی ٹوئنٹی ورلڈکپ اور آسٹریلیا کے خلاف ہوم سیریز کے لیے پاکستان اسکواڈ کے حتمی اعلان سے پہلے رواں ہفتے مشاورت ہوگی۔
ذرائع کے مطابق ہیڈ کوچ مائیک ہیسن دورۂ سری لنکا کے اختتام پر لاہور پہنچ رہے ہیں، اور قومی ٹی ٹوئنٹی اسکواڈ کے اراکین سری لنکا میں سیریز کھیلنے کے بعد آج وطن واپس آ رہے ہیں۔ ہیڈ کوچ مائیک ہیسن اور کپتان سلمان علی آغا سلیکٹرز کے ساتھ اسکواڈ پر حتمی مشاورت کریں گے۔
ذرائع کا کہنا ہے کہ مشاورت مکمل ہونے کے بعد چیئرمین پی سی بی محسن نقوی کی منظوری سے اسکواڈ کا اعلان کر دیا جائے گا۔ پی سی بی نے ٹی ٹوئنٹی ورلڈکپ کے لیے ابتدائی نام آئی سی سی کو پہلے ہی بھجوا دیے ہیں، اور 31 جنوری سے قبل آئی سی سی کی اجازت کے بغیر ان ناموں میں تبدیلی بھی ممکن ہے۔
ممکنہ کھلاڑیوں میں کپتان سلمان علی آغا، صاحبزادہ فرحان، صائم ایوب، فخر زمان، شاداب خان، بابر اعظم، فہیم اشرف، محمد نواز، عثمان خان اور ابرار احمد شامل ہیں۔
شاہین آفریدی، نسیم شاہ، حارث رؤف، سلمان مرزا اور خواجہ نافع بھی ممکنہ کھلاڑیوں میں شامل ہیں، جبکہ عبدالصمد، محمد وسیم جونیئر اور عثمان طارق ریزرو کھلاڑی کے طور پر شامل ہو سکتے ہیں۔
