راولپنڈی: فیلڈ مارشل سید عاصم منیر سے ورلڈ لبرٹی فنانشل امریکا کے اعلیٰ سطحی وفد نے ملاقات کی، جس کا مقصد کراس بارڈر ڈیجیٹل فنانس کے فروغ اور مالی شمولیت کو مزید مضبوط بنانا ہے۔
پاک فوج کے شعبہ تعلقات عامہ (آئی ایس پی آر) کے مطابق بدھ کے روز ورلڈ لبرٹی فنانشل امریکا کے وفد نے فیلڈ مارشل سید عاصم منیر سے ملاقات کی۔ وفد کی قیادت معروف عالمی فن ٹیک کمپنی کے چیف ایگزیکٹو آفیسر زچری وٹکوف کر رہے تھے۔
آئی ایس پی آر کے مطابق یہ ملاقات بین الاقوامی نجی سرمایہ کار گروپس کی جانب سے پاکستان کی ابھرتی ہوئی معاشی صورتحال میں بڑھتی ہوئی دلچسپی کی عکاس ہے۔ ملاقات کے دوران پاکستان میں ڈیجیٹل فنانس، فن ٹیک سیکٹر اور مالی شمولیت کے فروغ سے متعلق امور پر تفصیلی تبادلہ خیال کیا گیا۔
آئی ایس پی آر کا کہنا ہے کہ یہ ملاقات پاکستان کی فن ٹیک صلاحیتوں پر عالمی اعتماد میں اضافے کو ظاہر کرتی ہے۔ وفد کے سربراہ نے جدید ٹیکنالوجی کے فروغ اور ڈیجیٹل نظام کو اپنانے کے لیے پاکستانی قیادت کی کوششوں کو سراہا اور پاکستان کی اقتصادی صلاحیت کے مکمل امکانات کو بروئے کار لانے کے اقدامات کی تعریف کی۔
آئی ایس پی آر کے مطابق فیلڈ مارشل سید عاصم منیر نے وفد کے ساتھ خیالات کے تبادلے کا خیر مقدم کیا اور پاکستان میں اقتصادی استحکام، سرمایہ کاروں کے اعتماد کے فروغ اور قومی ترقی میں ذمہ دار نجی شعبے کی شمولیت کے لیے سازگار ماحول فراہم کرنے کے عزم کا اعادہ کیا۔
واضح رہے کہ بدھ کے روز پاکستان اور ورلڈ لبرٹی فنانشل کے درمیان ڈیجیٹل ادائیگیوں میں جدت کے فروغ کے لیے ایک مفاہمتی یادداشت پر بھی دستخط کیے گئے۔ اس موقع پر منعقدہ تقریب میں وزیراعظم شہباز شریف، نائب وزیراعظم اسحاق ڈار، چیف آف ڈیفنس فورسز فیلڈ مارشل سید عاصم منیر، وزیر خزانہ محمد اورنگزیب، چیئرمین پاکستان ورچوئل اثاثہ جات ریگولیٹری اتھارٹی سمیت دیگر اعلیٰ حکام نے شرکت کی۔
