لاہور: شہر کے معروف اسٹیج اداکار قیصر پیا کو لاہور کے علاقے گارڈن ٹاؤن میں ٹریفک سگنل پر لوٹ لیا گیا، جہاں چور ان کا قیمتی موبائل فون چھین کر فرار ہو گئے۔
پولیس کے مطابق قیصر پیا اپنی گاڑی میں سفر کر رہے تھے کہ ٹریفک سگنل پر گاڑی رکی، اسی دوران ایک ملزم نے گاڑی کو ہاتھ مارا اور بلاوجہ جھگڑا شروع کر دیا۔ اسی دوران دوسرا ملزم گاڑی کی دوسری جانب سے آ کر موقع کا فائدہ اٹھاتے ہوئے اداکار کا موبائل فون چھین کر فرار ہو گیا۔
واقعے کے بعد قیصر پیا نے گارڈن ٹاؤن تھانے میں درخواست دی، جس پر پولیس نے مقدمہ درج کر کے تحقیقات کا آغاز کر دیا ہے۔ پولیس نے کہا ہے کہ ملزمان کی تلاش جاری ہے اور علاقے کے سی سی ٹی وی کیمروں سے شواہد حاصل کرنے کی کوشش کی جا رہی ہے۔
