واشنگٹن: امریکا نے پاکستان سمیت 75 ممالک کے شہریوں کے لیے امیگرنٹ ویزا پراسیس معطل کرنے کا اعلان کر دیا ہے۔
امریکی محکمہ خارجہ کے مطابق ان ممالک سے تعلق رکھنے والے متعدد تارکینِ وطن امریکی عوام کے ٹیکس سے حاصل ہونے والی سرکاری سہولیات سے استفادہ کر رہے تھے، جس کے باعث یہ فیصلہ کیا گیا۔
امریکی نشریاتی ادارے فاکس نیوز کے مطابق جن ممالک کے شہریوں کے لیے امیگرنٹ ویزا پراسیس معطل کرنے کا اعلان کیا گیا ہے، ان میں پاکستان، صومالیہ، افغانستان، ایران، روس، برازیل، نائیجیریا، تھائی لینڈ، عراق، اردن، قازقستان، کویت، کرغزستان، لبنان، لیبیا، نیپال، کانگو، روانڈا، سوڈان، شام، تنزانیہ، ازبکستان اور دیگر ممالک شامل ہیں۔
امریکی میڈیا کے مطابق یہ معطلی 21 جنوری سے نافذ العمل ہوگی۔ اس حوالے سے امریکی سفارت خانوں کو ہدایت جاری کر دی گئی ہے کہ جب تک محکمہ خارجہ امیگرنٹ ویزا سے متعلق طریقہ کار کا ازسرِ نو جائزہ مکمل نہیں کر لیتا، موجودہ قوانین کے تحت ویزے جاری کرنے سے انکار کیا جائے۔ محکمہ خارجہ نے اس معطلی کے لیے تاحال کسی مدت کا تعین نہیں کیا ہے۔
دوسری جانب امریکی محکمہ خارجہ نے سوشل میڈیا پلیٹ فارم ایکس پر جاری بیان میں کہا ہے کہ یہ پابندی اس وقت تک برقرار رہے گی جب تک امریکا اس بات کو یقینی نہیں بنا لیتا کہ نئے آنے والے تارکینِ وطن امریکی عوام کی دولت اور ٹیکسز سے ناجائز فائدہ نہیں اٹھائیں گے۔
محکمہ خارجہ کے بیان میں مزید کہا گیا ہے کہ ان ممالک سے آنے والے کئی تارکین وطن امریکا پہنچتے ہی ریاست پر مالی بوجھ بن جاتے ہیں، جس کے باعث امیگریشن پالیسی پر نظرثانی ناگزیر ہو گئی ہے۔
