بی بی ایل: سست بیٹنگ پر رضوان کو میدان سے واپس بلانے پر کوچ اور کپتان نے معافی مانگ لی

بگ بیش لیگ میں محمد رضوان کو بیٹنگ کے دوران ریٹائرڈ کرا کر واپس بلانے پر میلبرن رینیگیڈز کی انتظامیہ نے معافی مانگ لی۔

ذرائع کے مطابق میلبرن رینیگیڈز کے کپتان اور کوچ نے پاکستانی وکٹ کیپر بیٹر سے معذرت کی۔ کپتان وِل سدرلینڈ کا کہنا تھا کہ رضوان اچھے کھلاڑی ہیں اور میچ دل چسپ مرحلے میں تھا، تاہم وہ اپنے رویے پر شرمندہ ہیں۔

محمد رضوان نے کہا کہ یہ درست نہیں کہ وہ بگ بیش لیگ چھوڑ کر واپس آرہے ہیں۔ انہوں نے کہا کہ بات ماننا ان کا فرض ہے اور ان کے مذہب میں بھی امیر کی اطاعت کی تلقین کی گئی ہے، میچ میں کپتان امیر ہوتے ہیں۔

دوسری جانب مداحوں نے محمد رضوان کو زبردستی ریٹائر آؤٹ کیے جانے کو شرمناک قرار دیا تھا۔

واضح رہے کہ محمد رضوان جاری بگ بیش لیگ سیزن میں بیٹنگ کے اعتبار سے مشکلات کا شکار رہے ہیں۔ انہوں نے اب تک 8 میچوں میں 167 رنز بنائے ہیں، ان کی اوسط 20.88 رہی اور وہ ایک بھی نصف سنچری اسکور کرنے میں کامیاب نہیں ہو سکے۔