کراچی: پاکستان کی معروف ٹی وی اور فلم اداکارہ ہانیہ عامر نے کراچی میں پیش آنے والے سانحہ گل پلازہ پر اپنے جذباتی ردعمل کا اظہار کیا ہے۔
انسٹاگرام اسٹوری پر ایک پوسٹ میں ہانیہ عامر نے سانحے کے حوالے سے غفلت اور حفاظتی انتظامات کی عدم موجودگی پر سوال اٹھایا۔ انہوں نے لکھا کہ "گل پلازہ میں جو ہوا وہ نہایت دل دہلا دینے والا ہے، جس طرح قیمتی جانوں کا ضیاع ہوا وہ نہیں ہونا چاہیے تھا۔”
اداکارہ نے مزید کہا کہ یہ محض ایک حادثہ نہیں تھا، بلکہ ایک یاددہانی ہے کہ کس طرح غفلت، حفاظتی انتظامات کی کمی اور خاموشی کی قیمت عام لوگوں کو اپنے مستقبل سے چکانی پڑتی ہے۔
ہانیہ عامر نے اپنے پیغام میں متاثرین کے ساتھ تعزیت کے ساتھ ساتھ جوابدہی کی ضرورت پر بھی زور دیا اور دعا کی کہ اللہ پسماندگان کو اس ناقابل تصور نقصان پر صبر عطا فرمائے۔
