راولپنڈی: 163 ہائی رائز عمارتوں میں سے صرف ایک کمرشل عمارت کو مکمل محفوظ قرار دینے کا انکشاف ہوا ہے۔
پنجاب کمیونٹی سیفٹی بلڈنگ ریگولیشنز کے مطابق راولپنڈی میں موجود 163 ہائی رائز عمارتوں میں خودکار اور مکمل فائر سیفٹی سسٹم صرف ایک عمارت میں موجود ہے۔
ریسکیو ذرائع کے مطابق عمارتوں کی درجہ بندی کے بعد کیٹیگری اے میں صرف ایک ہوٹل کو محفوظ قرار دیا گیا ہے، کیٹیگری بی اور سی کی 11 عمارتوں میں فائر سیفٹی سسٹم نامکمل ہے، جبکہ کیٹیگری سی میں شامل 151 عمارتیں مکمل طور پر غیر محفوظ ہیں۔
ذرائع نے بتایا کہ 7 کمرشل عمارتوں میں داخلی راستے، آگ بجھانے کے خودکار نظام اور دھوئیں کے اخراج کا نظام موجود نہیں، جبکہ 151 عمارتوں میں نہ صرف سیفٹی آلات بلکہ ہنگامی راستے اور دھواں اخراج کا خودکار نظام بھی موجود نہیں ہے۔
ریسکیو ذرائع نے مزید کہا کہ گزشتہ سال راولپنڈی میں آگ لگنے کے 1712 واقعات پیش آئے جن میں 4 افراد جاں بحق اور 107 افراد زخمی ہوئے۔ پنجاب میں آگ کے واقعات کے حوالے سے راولپنڈی تیسرے نمبر پر ہے، تاہم ریسکیو 1122 کا ایمرجنسی رسپانس ٹائم گزشتہ سال اوسطاً 8 منٹ سے بھی کم رہا۔