اسلام آباد: وفاقی وزیر احسن اقبال نے کہا ہے کہ غزہ امن بورڈ میں پاکستان کی شمولیت فلسطینی عوام پر جاری اسرائیلی مظالم کو روکنے کے لیے کی گئی ہے۔
پارلیمنٹ کے مشترکہ اجلاس میں حکومت نے غزہ امن بورڈ میں شمولیت کا دفاع کرتے ہوئے واضح کیا کہ پاکستان نے اس اقدام سے خطے میں امن کے فروغ میں اپنا کردار ادا کیا ہے۔ وفاقی وزیر احسن اقبال نے کہا کہ ہمیں کوئی بزدلی یا غفلت کا طعنہ نہیں دے سکتا۔
انہوں نے مزید کہا کہ مسلم لیگ ملکی سلامتی اور اصولی موقف پر کسی سے سبق لینے کی محتاج نہیں، اور غزہ امن بورڈ میں شمولیت کا مقصد صرف مظلوم فلسطینی عوام کی حمایت اور جاری ظلم کو روکنا ہے۔
وفاقی وزیر نے کہا کہ اگر پاکستان امن بورڈ کا حصہ نہ بنتا تو اپوزیشن الزام لگاتی کہ پاکستان تنہا رہ گیا ہے، جبکہ آج جب پاکستان کو عالمی سطح پر اہم کردار ملا ہے تو اس پر خوش ہونا چاہیے۔
