برطانیہ نے ایران اور امریکا کے درمیان بڑھتی ہوئی کشیدگی کے پیشِ نظر قطر میں لڑاکا طیارے تعینات کر دیے ہیں۔
برطانوی میڈیا کے مطابق برطانوی فضائیہ نے قطر میں چار ٹائفون لڑاکا طیارے تعینات کیے ہیں۔ برطانوی وزارتِ دفاع کا کہنا ہے کہ یہ لڑاکا طیارے دفاعی مقاصد کے لیے بھیجے گئے ہیں اور علاقے میں سیکیورٹی کی صورتحال پر نظر رکھنے کے لیے تعینات کیے گئے ہیں۔
گذشتہ روز ائیر فورس ون میں صحافیوں سے گفتگو کرتے ہوئے امریکی صدر ڈونلڈ ٹرمپ نے بھی کہا تھا کہ امریکا کی بڑی فورس ایران کی جانب روانہ ہو رہی ہے اور متعدد جہاز ایران کی طرف جا رہے ہیں۔ انہوں نے مزید کہا کہ امریکا ایران کے قریب احتیاطی طور پر فورس تعینات کر رہا ہے اور دیکھنا ہے کہ آگے کیا ہوتا ہے۔
صدر ٹرمپ نے اس سے قبل واضح کیا تھا کہ اگرچہ وہ ایران کے خلاف مزید فوجی کارروائی نہیں کرنا چاہتے، لیکن اگر ایران نے اپنا جوہری پروگرام دوبارہ شروع کیا تو امریکا مناسب جواب دے گا۔
