مری میں شدید برفباری کے باعث نظام زندگی مفلوج ہو کر رہ گیا ہے، رابطہ سڑکیں بند، مواصلاتی نظام متاثر اور ٹریفک بری طرح متاثر ہے۔
محکمہ موسمیات کے مطابق مری میں گزشتہ 24 گھنٹوں سے مسلسل برفباری کا سلسلہ جاری ہے۔ تقریباً 2 فٹ برفباری کے باعث عوامی اور سیاحتی سرگرمیاں شدید متاثر ہو گئی ہیں، جبکہ بجلی کا طویل بریک ڈاؤن بھی برقرار ہے۔
برفباری کے نتیجے میں متعدد رابطہ سڑکیں مکمل طور پر بند ہو گئی ہیں اور سیاحوں کا داخلہ تاحال ممنوع ہے۔ جھیکا گلی کی ایم آئی ٹی روڈ برف سے ڈھک جانے کے بعد بند پڑی ہے اور کچھ گاڑیاں وہاں پھنس کر رہ گئی ہیں۔ علاوہ ازیں، راولپنڈی اور اسلام آباد سے مری میں مزید گاڑیوں کا داخلہ بھی بند کر دیا گیا ہے۔
کمشنر راولپنڈی انجینئر عامر خٹک کا کہنا ہے کہ مسلسل برفباری کے باعث رابطوں میں دشواری ہے، تاہم ضلعی انتظامیہ، پولیس، ریسکیو 1122 اور پاک فوج کے جوان امدادی سرگرمیوں میں مصروف ہیں۔ انہوں نے کہا کہ برفباری میں پھنسے سیاحوں کو محفوظ مقامات پر منتقل کیا جا رہا ہے۔
وزیر اعلیٰ پنجاب خود صورتحال کی نگرانی کر رہی ہیں اور سیاحوں سے اپیل کی گئی ہے کہ غیر ضروری سفر سے گریز کریں تاکہ کسی بھی ناخوشگوار حادثے سے بچا جا سکے۔
محکمہ موسمیات کا کہنا ہے کہ مری میں برفباری کا سلسلہ آئندہ 24 گھنٹے تک جاری رہنے کا امکان ہے، جس کے باعث محتاط رویہ اختیار کرنا ضروری ہے۔
